Qashqadaryoda “dacha”ga dam olishga borgan ikki ayol “dacha” atrofidagi daryoda oqib ketib, vafot etdi. Bu haqda “Millar” dasturida xabar berildi.
Ma’lum qilinishicha, voqea 7-iyul kuni yuz bergan. Ular cho‘milish maqsadida Oqdaryoning o‘ng qirg‘og‘iga tushib, oqib ketishi sabab halok bo‘lgan. Har ikki ayol 61 yoshda bo‘lgan.
Bosh prokuratura matbuot xizmatining bildirishicha, ikki ayol daryoda cho‘kib vafot etgani yuzasidan tergovga qadar tekshiruv harakatlari olib borilmoqda. Ularning o‘limi yuzasidan sud-tibbiyot ekspertizasi tayinlangan. Tekshiruv ishlari davom etmoqda.
May oyining oxirlarida Samarqand viloyatining Paxtachi tumanida ikki nafar o‘quvchi hovuzda cho‘kib ketib, halok bo‘lgandi. Toshkentning Bo‘rijar kanaliga tushib ketgan qizni qutqargan erkakning o‘zi halok bo‘lgani xabar qilingandi. Shuningdek, Farg‘onada uch nafar voyaga yetmagan bola sun’iy suv havzasiga cho‘kib ketgan edi. Sirdaryo viloyati Mirzaobod tumanida 14 yoshli maktab o‘quvchisi kanalda cho‘kib ketgandi.
Respublika shoshilinch tibbiy yordam markaziga 2025-yil 12-maydan 10-iyulgacha Toshkentning turli hududlaridan yetti nafar bola cho‘kishi bilan bog‘liq murojaatlar kelib tushgan. Ulardan biri vafot etgan.
Izoh (0)