Google kompaniyasi yangi Android 7.0 Nougat mobil operatsion dasturini rasman taqdim etdi. Unga kiritilgan qator o‘zgarish va yangiliklar dasturni barqarorlashtirdi va resurslar xarajatini qisqartirdi, deb ma’lum qiladi “Hi-Tech.Mail.ru”.
Kenja Nexus’dan tashqari, yettinchi Android’ni qimmatroq modellarga ham o‘rnatsa bo‘ladi.
Tashqi ko‘rinishi jihatidan Android 7.0 Nougat ilgarigi versiyadan kam farqlanadi, negaki asosiy urg‘u tezkorlik va barqarorlikka berilgan edi. Eng katta o‘zgarish ogohlantirishlar bilan bog‘liq — ular butun ekran kengligini egallab, dasturga ko‘ra guruhlanadi. Bundan tashqari, yangi operatsion dasturda ogohlantirishlar interfaolligini ta’minlaydigan API realizatsiya qilingan.
Shuningdek, tezkor sozlamalar menyusi optimallashtirildi — ularni ogohlantirishlar bilan birga ochish mumkin bo‘ladi.
Android 7.0 da ikki dasturni parallel ravishda ishlatish imkoniyati mavjud. Funksiyani faollashtirish uchun ko‘p vazifalilik tugmasini ushlab turish talab etiladi.
Vulkan API to‘g‘ridan-to‘g‘ri grafik chip bilan ishlash imkoniyatini beradi hamda foydalanuvchiga vizual effektlarning katta kutubxonasini taklif etadi. U grafik chipga tushayotgan yuklamani kamaytiradi, buning natijasida smartfon tezligi oshadi. Ilgariroq Vulkan API faqat Samsung Galaxy S7, S7 Edge va Samsung Galaxy Note 7 da bor edi.
Doze 2.0 quvvatni tejash texnologiyasi ilk bor Android 6.0 da taqdim etilgan edi. Operatsion dastur smartfon qachon ishlatilayotganini va qachon ishlatilmayotganini farqlab, ikkinchi holatda uskunani kutish rejimiga o‘tkazadi. Ekspertlarning fikricha, ikkinchi Doze akkumulyator hayotini 15–20 foizga uzaytiradi.
Yangi dasturiy ta’minotda fon rejimida yangilanish joriy etildi. Tizim va dasturlar uskuna o‘chirib yoqilganida yashirin tarzda o‘rnatilishi mumkin. Burun e’tirozlarga sabab bo‘lgan “Dasturlar optimizatsiyasi” olib tashlandi.
Ammo bu funksiya barcha uskunalarda ham bo‘lmaydi, xususan, Google Nexus smartfonlarida u yo‘q. Gap shundaki, fon rejimida yangilanish uchun xotiraning qo‘shimcha bo‘limi lozim bo‘ladi.
Bundan tashqari, endilikda Android boshqaruvidagi yangi uskunaga nafaqat Google akkauntidagi yoki boshqa Android-uskunadan, balki iPhone va iPad’dan ham ma’lumot ko‘chirsa bo‘ladi.
Mayda o‘zgarishlar ham bor. Masalan, Android 7.0 Emoji Unicode 9 hamda 72 ta yangi emodzi qo‘llab-quvvatlanadi, emodzilarning umumiy soni esa 1,5 mingga yetdi. “Kamera” dasturi yordamida ishlab chiqaruvchilar yuz tanish tizimini yaxshiladi, virtual reallikning qo‘llab-quvvatlanishi hamda buzilgan dasturlardan himoyani joriy etdi. Interfeys va shrift o‘lchovlarini endi alohida sozlash mumkin.
Android 7.0 dastlab Nexus 6, 5X, 6P, 9 smartfonlarida, shuningdek, Nexus Player hamda Google Pixel C planshetida paydo bo‘ladi. Yangilanish yaqin haftalarda to‘lqin shaklida tarqatiladi. Boshqa smartfonlarga yangilanish yetib borishi muddatlari ishlab chiqaruvchilarga bog‘liq. LG V20 musiqiy flagmani sentabrda Android 7.0 dasturiy ta’minotida taqdim etilishi kutilmoqda.
Izoh (0)