2016-yil so‘ngiga qadar Chechenistonning Shali shahrida respublika rahbari Ramzan Qodirov nomi berilgan masjid ochiladi, deb yozadi EADaily.
Masjid loyihasi o‘zbekistonlik me’morlar tomonidan O‘rta Osiyoning qadimgi islomiy poytaxtlari — Buxoro va Samarqandda barpo etilgan masjidlar uslubida yaratilgan. Nashr ta’kidlashicha, Chechenistondagi masjidning Buxoroga xos ko‘rinishi Chechenistonning hozirgi O‘zbekistonda joylashgan so‘fiylik markazlari bilan aloqasi timsoli bo‘lib xizmat qiladi.
Shuningdek, Ramzan Qodirov nomidagi masjidning o‘zbekona uslubi Qodirovlar oilasining O‘zbekiston bilan aloqasini namoyon qiladi. Checheniston rahbarining otasi Ahmad Qodirov Buxoroning Mir Arab madrasasida va Toshkent islom institutida o‘qigan. Shayx Muhammad Sodiq Muhammad Yusuf unga O‘zbekistondagi o‘qishi chog‘ida ustozlik qilgan, keyinchalik u Qodirovlar oilasining yaqin do‘stiga aylangan.
Masjid “Shali-Siti” osmono‘par binolar majmuasi yaqinidagi besh gektarlik maydonda qurilmoqda. Uning to‘rt tomonida bittadan har biri 63 metrli minoralar qad ko‘taradi, masjid gumbazining balandligi esa 43 metrga yetadi.
Inshootni Chechenistonning “Mechetstroy” kompaniyasi barpo etmoqda, qurilish 2012-yil dekabridan buyon uzluksiz davom etmoqda.
Checheniston OAVlari yozishicha, uslubi va bezaklariga ko‘ra, Shalidagi masjid dunyoda o‘xshashi yo‘q bo‘ladi. Uning ichki va tashqi tomonlari oq yunon marmari bilan qoplanadi. Yoritish tizimi Italiya kompaniyasiga ishonib topshirilgan.
Izoh (0)