Rio–2016 Olimpiada o‘yinlari boks musobaqasining -69 kilogramm vazn toifasida ishtirok etayotgan o‘zbekistonlik bokschi Shahram G‘iyosov chorak finalda kubalik Ronyel Iglesias ustidan erishilgan g‘alabani “Real” klubi va Portugaliya termasi hujumchisi Krishtianu Ronaldu uslubida nishonladi.
Yarim finalga chiqib, kamida bronza medalini taqdim qilgan Shahram G‘iyosovning Ronaldu uslubidagi xatti-harakati Marca, Goal, CBC Goal kabi mashhur xorijiy nashrlar e’tiboriga tushdi.
https://twitter.com/Footy_Jokes02/status/764751672241422336
“Krishtianu Ronalduning o‘sha mashhur yugurishi, sakrashi va aylanishini Riodagi Olimpiada o‘yinlarida ham ko‘rish mumkin bo‘ldi. Faqat futbol maydonida emas, boks ringida — o‘zbekistonlik bokschi Shahram G‘iyosov ijrosida”, — deb yozadi Goal.
“Shahram G‘iyosov Braziliyada shuhrat qozonishga ulgurdi. London–2012 Olimpiada o‘yinlarining o‘rta vazndagi chempioni kubalik Ronyel Iglesiasni mag‘lubiyatga uchratgan G‘iyosov o‘z g‘alabasini antiqa tarzda nishonlashi uchun sabab bo‘ldi”, – deyiladi CBC Sports nashrida.
“O‘zbekistonlik bokschi Shahram G‘iyosov chorak finaldagi g‘alabasini shu tarzda nishonladi”, – deb quyidagi suratni ilova qildi Marca.
Eslatib o‘tamiz, final yo‘llanmasi uchun Shahram G‘iyosov marokashlik Muhammad Rabi bilan kuch sinashadi.
Izoh (0)