O‘zbekiston mustaqilligining 25 yilligi arafasida  Milliy xavfsizlik xizmati chegara qo‘shinlarining Samarqand viloyatidagi harbiy qismlari xizmatchilari uchun yangi uy-joylar hamda chegara posti foydalanishga topshirildi. Bu haqda O‘zA xabar bermoqda.

Shu munosabat bilan o‘tkazilgan tadbirda Samarqand viloyati hokimi Z. Mirzayev ishtirok etdi.

Bunyodkorlik ishlari davomida 1,7 gektar maydonda maishiy xizmat ko‘rsatish kompleksi qurildi. Majmuadan dorixona, choyxona, go‘zallik saloni, erkaklar va ayollar sartaroshxonasi, sun’iy qoplamali stadion o‘rin olgan. Zamonaviy loyiha asosida qurilgan “O‘ray-Elipok” mahalla markazi va 120 o‘rinli maktabgacha ta’lim muassasasi ham hududda joylashgan.

Urgut tumanidagi harbiy qism yangi chegara posti majmuasida ham xizmatchilar uchun barcha sharoit yaratilgan. Bu yerda askarlar turar joyi, oshxona, tibbiyot xonasi, maishiy xizmat ko‘rsatish shoxobchasi va boshqa zarur xizmat xonalari qad rostladi.

“Harbiyning doimo xizmatga shayligi va zimmasidagi burchni to‘la-to‘kis ado etishi uning ma’nan va jismonan barkamolligiga bog‘liq, — dedi katta leytenant O‘tkirbek Xo‘jamurodov. — Chegara postimizda bu jihatlar alohida e’tiborga olingan. Zamonaviy mini-futbol stadioni, ma’naviyat xonasi xizmatchilar ixtiyorida. Eng muhimi, qismda xizmat qilayotgan harbiylarga shu yerning o‘zida barcha qulayliklarga ega sakkiz turar joy binosi qurib berildi. Bu xizmatchilarni oilalaridan ko‘ngli to‘q holda o‘z burchini bajarishga undaydi”.