Xalqaro olimpiya qo‘mitasi Olimpiada o‘yinlari translyatsiyasidan animatsiyalangan tasvirlar yaratishni taqiqlab qo‘ydi

Xalqaro olimpiya qo‘mitasi Olimpiada o‘yinlari translyatsiyasidan animatsiyalangan tasvirlar va qisqa videolar yaratishni taqiqlab qo‘ydi, deb yozadi “TASS” tashkilotning OAVlar uchun chiqarilgan qoidalariga tayanib.

“Olimpiada materiallaridan GIF, GFY, WebM kabi formatlardagi grafik animatsiyalangan tasvirlar yoki ‘Vayn’ (Vine) kabi qisqa videolarni yaratish uchun foydalanish qat‘iyan taqiqlanadi”, — deyiladi qoidalarda. Shuningdek, taqiq Periscope va shu kabi boshqa servislar orqali to‘g‘ridan-to‘g‘ri translyatsiyalar uchun ham amal qiladi.

Ushbu choralarni Xalqaro olimpiya qo‘mitasi mualliflik huquqlari himoyasi bilan izohladi, shu tufayli tashkilot taqiqlari musobaqalarni translyatsiya qilish uchun litsenziyali huquqqa ega kompaniyalarga tegishli emas.