2016-yilning birinchi yarmida O‘zbekistondan Birlashgan Arab Amirliklari va Janubiy Afrika Respublikasiga yengil avtomobillarni eksport qilish yo‘lga qo‘yildi. Bu haqda Iqtisodiyot vazirligi va Davlat statistika qo‘mitasining O‘zbekiston Respublikasini 2016-yilning birinchi yarmida ijtimoiy-iqtisodiy rivojlantirish yakunlari bo‘yicha hisobotida aytib o‘tildi. Hisobotni O‘zbekiston Milliy axborot agentligi e’lon qildi.
Unda ta’kidlanishicha, joriy yil boshidan buyon ilgari o‘z mahsulotlarini eksport qilmagan qariyb 600 korxona eksport faoliyatiga jalb etildi, 208 turdagi yangi mahsulot eksportga yetkazib berildi. Yangi eksport bozorlari soni 44 taga ko‘paydi.
“Xususan, Birlashgan Arab Amirliklari va Janubiy Afrika Respublikasiga yengil avtomobillar, Buyuk Britaniyaga kuch agregatlari, dvigatellar tarkibiy qismlari, Latviyaga g‘ildirak disklari, Janubiy Koreyaga avtogeneratorlar, Yaponiyaga vinomateriallar, AQSh va Isroilga vino-aroq mahsulotlari, XXR, Turkiya, Janubiy Koreya, Latviya, Afg‘onistonga polietilen va polipropilen, Shvetsiya, Ruminiya, Bolgariya, Turkiya, Indoneziya, Moldova, Ozarbayjonga mineral o‘g‘itlar, Niderlandiyaga metall molibdeni va reniy, Hindiston va Eronga metall ruxi, Belarusga sport poyabzallari, Polsha va Janubiy Koreyaga charm buyumlari va boshqa mahsulotlar eksport qilindi”, — deyiladi hujjatda.
Izoh (0)