Samarqand shahridagi svetofor ishlamay qolgan ko‘chalarning birida ko‘ngilli fuqaro piyodalar va avtomobillar harakatini tartibga solib turdi. Bu haqda Facebook’dagi “Voditeli Tashkenta” guruhida videoxabar e’lon qilingan.
Videoxabar ostida qoldirilgan fikrlarda aksariyat foydalanuvchilar ko‘ngillining harakatlarini olqishlagan, ayni vaqtda, bir guruh foydalanuvchilar Yo‘l harakati qoidalari bo‘yicha oddiy fuqaro bunday faoliyat bilan shug‘ullanishi mumkin emasligini bildirgan.
Amaldagi Yo‘l harakati qoidalariga ko‘ra, tartibga soluvchi — Ichki ishlar vazirligi Davlat yo‘l harakati xavfsizligi xizmati, harbiy avtomobil nazorati organlari xodimi, o‘z xizmat vazifalarini bajarayotgan, Qoidalarda ko‘zda tutilgan ishoralar yordamida yo‘l harakatini tartibga solish vakolatiga ega bo‘lgan va uni bevosita amalga oshirayotgan, yo‘ldan foydalanish xizmati xodimlari, temir yo‘l kesishmasi va sol kechuvlaridagi navbatchilardir.
Tartibga soluvchi maxsus kiyim va (yoki) taniqlik belgisi (qo‘l bog‘ichi, jezl, qizil ishorali yorug‘lik qaytargich, qizil chiroq yoki bayroqcha)ga ega bo‘lishi shart. Videoda esa samarqandlik ko‘ngilli faqat hushtakka egaligini, avtomobillar va piyodalar harakatini esa qo‘li bilan tartibga solib turganini ko‘rish mumkin.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)