Самарқанд шаҳридаги светофор ишламай қолган кўчаларнинг бирида кўнгилли фуқаро пиёдалар ва автомобиллар ҳаракатини тартибга солиб турди. Бу ҳақда Facebook’даги «Водители Ташкента» гуруҳида видеохабар эълон қилинган.
Видеохабар остида қолдирилган фикрларда аксарият фойдаланувчилар кўнгиллининг ҳаракатларини олқишлаган, айни вақтда, бир гуруҳ фойдаланувчилар Йўл ҳаракати қоидалари бўйича оддий фуқаро бундай фаолият билан шуғулланиши мумкин эмаслигини билдирган.
Амалдаги Йўл ҳаракати қоидаларига кўра, тартибга солувчи — Ички ишлар вазирлиги Давлат йўл ҳаракати хавфсизлиги хизмати, ҳарбий автомобиль назорати органлари ходими, ўз хизмат вазифаларини бажараётган, Қоидаларда кўзда тутилган ишоралар ёрдамида йўл ҳаракатини тартибга солиш ваколатига эга бўлган ва уни бевосита амалга ошираётган, йўлдан фойдаланиш хизмати ходимлари, темир йўл кесишмаси ва сол кечувларидаги навбатчилардир.
Тартибга солувчи махсус кийим ва (ёки) таниқлик белгиси (қўл боғичи, жезл, қизил ишорали ёруғлик қайтаргич, қизил чироқ ёки байроқча)га эга бўлиши шарт. Видеода эса самарқандлик кўнгилли фақат ҳуштакка эгалигини, автомобиллар ва пиёдалар ҳаракатини эса қўли билан тартибга солиб турганини кўриш мумкин.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)