Qoraqalpog‘iston Respublikasining Mo‘ynoq va Qo‘ng‘irot tumanlari hududida “Sayg‘oqlar uchun” kompleks landshaft qo‘riqxonasi tashkil etiladi. Bu haqda, Tabiatni muhofaza qilish davlat qo‘mitasiga asoslanib, “Gazeta.uz” xabar bermoqda.

Qo‘riqxonaning tashkil etilishi Vazirlar Mahkamasining 22-iyuldagi “Kompleks (landshaft) qo‘riqxonalarni tashkil etish va ularning faoliyati bilan bog‘liq masalalarni tartibga solish chora-tadbirlari to‘g‘risida”gi qarorida ko‘zda tutilgan. “Sayg‘oqlar uchun” qo‘riqxonasi negizida tashkil etilayotgan davlat tabiatni muhofaza qilish muassasasi uchun 628,3 ming gektar yer ajratilishi nazarda tutilgan bo‘lib, bu hudud besh uchastkaga bo‘linadi. Bu uchastkalar sayg‘oqlar va boshqa turdagi jonivorlarning yashashi uchun eng qulay sharoit bor hududlar sifatida tanlab olingan. Bu yerlarda sayg‘oqlar an’anaviy tarzda tirikchilik qilib kelgan o‘tloqlar va suv manbalaridan iborat.

Bundan tashqari, xo‘jalik va boshqa turdagi faoliyatning salbiy ta’sirini kamaytirish maqsadida 219,8 ming gektar hududda qo‘riq zonasi yaratish ko‘zda tutilgan. Yuridik va jismoniy shaxslarning qo‘riq zonasida joylashgan yerlari musodara qilinmaydi.

Kompleks qo‘riqxona faoliyatining moliyalashtirilishi Tabiatni muhofaza qilish davlat qo‘mitasi huzuridagi Respublika hayvonot va o‘simlik dunyosini asrash va ulardan oqilona foydalanish davlat inspeksiyasi budjetdan tashqari jamg‘armasi mablag‘lari hisobidan amalga oshiriladi.

Qo‘riqxonaning yaratilishi sayg‘oqlar va boshqa noyob jonivorlar adadini ko‘paytirishga xizmat qiladi. Bu “Biologik xilma-xillik to‘g‘risida”gi hamda “Ko‘chib ketayotgan yovvoyi hayvon turlarini asrash to‘g‘risida”gi konvensiyalar, shuningdek, O‘zbekiston va Qozog‘iston hukumatlari o‘rtasidagi sayg‘oqlarni asrash, adadini qayta tiklash va ulardan barqaror foydalanish bo‘yicha kelishuvi doirasidagi qo‘shma tadbirlar rejasi bo‘yicha O‘zbekiston o‘z zimmasiga olgan majburiyatlardan bir qismi bajarilishi bo‘ladi.