So‘rovnoma: Yevro—2016 2-turidagi qaysi gol sizga ko‘proq yoqdi? (video)

Fransiya mezbonlik qilayotgan futbol bo‘yicha Yevropa Chempionatida 2-tur bellashuvlari o‘z yakuniga yetdi.

• “Daryo” o‘quvchilari Luka Modrichning golini Yevro—2016 1-turidagi eng yaxshisi deb topdi

Birinchisidan farqli o‘laroq, ikkinchi turga kelib yirik hisoblar va dubllar kuzatildi. Shu bilan birgalikda kutilmagan natijalar ham qayd etildi.

Quyida Yevro—2016 ning 2-turida kiritilgan eng yaxshi 8 ta gol tanlab olindi. Ulardan qaysi biri sizningcha eng chiroyli?

1. Vladimir Vayss

Qatar Yulduzlar Ligasida to‘p surayotgan futbolchi Rossiya termasi himoyasining haqiqiy yuzini ko‘rsatib berdi. Vayssga qadar Osiyoda to‘p tepayotgan birorta futbolchi Yevropa Chempionatida gol urmagandi.

2. Marek Hamshik

Rossiyaga qarshi o‘yinda Slovakiya termasi a’zolari a’lo darajada harakat qildi. Ikkinchi gol chiroyi borasida birinchisidan qolishmadi va bu gol o‘zini salbiy tomondan ko‘proq ko‘rsatayotgan rossiyalik muxlislarning unini biroz bo‘lsada o‘chirdi.

3. Dimitri Payet

Payetning 1-turdagi goli Modrichning zarbasi soyasida qolib ketgandi. “Daryo” o‘quvchilari ishtirok etgan so‘rovnomada Payet ikkinchi bo‘lib qoldi. Balki 2-turga kelib unga omad kulib boqar?

4. Garet Beyl

Payetning zarbasi Modrichning soyasida, Beylning 1-turdagi zarbasi Payetning goli soyasida qolib, 3-o‘ringa loyiq ko‘rilgandi. Bu safarchi? Masofa uzoqroq, raqib jiddiyroq, zarba kuchliroq, axir.

5. Eder

Italiya terma jamoasi Yevroning ortda qolgan o‘yinlarida eng yaxshi taassurot qoldirdi. Har ikki safar yorqin futbol namoyish etib bergan Antonio Konte shogirdlaridan bu safar Eder Jakkerinini almashtirdi. Uning goliga baho bering.

6. Milan Shkoda

Chexiya terma jamoasi Yevro—2016 dagi birinchi kambekni amalga oshirdi. O‘sha kambek Milan Shkodaning goli bilan boshlandi. Bosh bilan yo‘llangan mukammal zarba va ajoyib gol.

7. Alvaro Morata

Ispaniya terma jamoasi Yevro—2016 da 4 ta gol urdi. Alvaro Morata shulardan teng yarmiga mualliflik qildi. Uning mana bu zarbasi kimlargadir yoqib tushsa ajab emas, ayniqsa Ispaniya terma jamoasining ko‘p sonli muxlislariga.

8. Ivan Rakitich

Tag-tugi “Real”ga tegishli bo‘lgan futbolchidan tortib, ayni paytda “Real”da to‘p surayotgan Beylgacha ro‘yxatda bo‘lsa-yu, “Barselona”dan hech kim da’vogarlar qatorida bo‘lmasa, bu nima degan gap? Ivan Rakitich kemtikni yopishga urinadi. U Petr Chexning ustidan to‘pni ohista tashlab qo‘ya olgandi.

[playbuzz-item playbuzz_url="https://www.playbuzz.com/muhrima10/yevro-2016-guruh-bosqichi-2-turidagi-kimning-goli-sizga-ko-proq-yoqdi"]