Saudiya Arabistoni TIV: Tehron haj bilan bog‘liq vaziyatga siyosiy ruh bermoqda

Eron hukumati haj bilan bog‘liq vaziyatga siyosiy ruh bermoqda va Saudiya Arabistoni bilan kelishuv imzolashdan bosh tortmoqda. Shunday da’vo bilan qirollik tashqi ishlar vaziri Odil al-Jubayr chiqish qildi, deb yozadi “TASS”.

“Biz Eronning ushbu mamlakat fuqarolari uchun haj safari bilan bog‘liq barcha talablarini bajardik, ammo ular ushbu masalaga siyosiy ruh berishda davom etmoqda”, — dedi diplomat britaniyalik hamkasbi bilan birga o‘tkazilgan matbuot anjumanida.

“Saudiya Arabistoni hajga katta e’tibor qaratmoqda va hech kimga uni amalga oshirish uchun taqiq qo‘ygani yo‘q”, — deya qo‘shimcha qildi u.

Avvalroq Tehron va Ar-Riyodning eronlik ziyoratchi shialarga vizalar taqdim etish haqidagi muzokaralari muvaffaqiyatsiz kechgach, Eron madaniyat vaziri Ali Jannatiy eronlik ziyoratchilar bu yil Saudiya Arabistoniga haj safari uyushtira olmasligi mumkinligini ma’lum qilgan edi.

Saudiya Arabistoni hukumati esa Ar-Riyod, go‘yoki, eronlik ziyoratchilarga Makkaga haj safarini uyushtirishga to‘sqinlik qilayotgani haqidagi axborotni rad etdi.