Эрон ҳукумати ҳаж билан боғлиқ вазиятга сиёсий руҳ бермоқда ва Саудия Арабистони билан келишув имзолашдан бош тортмоқда. Шундай даъво билан қироллик ташқи ишлар вазири Одил ал-Жубайр чиқиш қилди, деб ёзади «ТАСС».
«Биз Эроннинг ушбу мамлакат фуқаролари учун ҳаж сафари билан боғлиқ барча талабларини бажардик, аммо улар ушбу масалага сиёсий руҳ беришда давом этмоқда», — деди дипломат британиялик ҳамкасби билан бирга ўтказилган матбуот анжуманида.
«Саудия Арабистони ҳажга катта эътибор қаратмоқда ва ҳеч кимга уни амалга ошириш учун тақиқ қўйгани йўқ», — дея қўшимча қилди у.
Аввалроқ Теҳрон ва Ар-Риёднинг эронлик зиёратчи шиаларга визалар тақдим этиш ҳақидаги музокаралари муваффақиятсиз кечгач, Эрон маданият вазири Али Жаннатий эронлик зиёратчилар бу йил Саудия Арабистонига ҳаж сафари уюштира олмаслиги мумкинлигини маълум қилган эди.
Саудия Арабистони ҳукумати эса Ар-Риёд, гўёки, эронлик зиёратчиларга Маккага ҳаж сафарини уюштиришга тўсқинлик қилаётгани ҳақидаги ахборотни рад этди.
Изоҳ (0)