Yevro—2016 o‘yinlarini O‘zbekistondagi jamoat joylarda namoyish etish uchun pul to‘lanmaydi

Futbol bo‘yicha Yevro—2016 musobaqasini O‘zbekistonda namoyish qilishning eksklyuziv huquqini qo‘lga kiritgan UzReport TV telekanali uchrashuvlarning ommaviy joylarda namoyish etilishi uchun pul talab qilmaydi. Bu haqda telekanalning “Sport” tahririyati bosh muharriri Yoqubjon Bobojonov o‘zining Twitter sahifasida ma’lumot berdi.

• JCh—2014 o‘yinlarini Toshkentdagi jamoat joylarida namoyish etish uchun O‘zMTRKga 1000 dollar to‘lash kerak

Yoqubjon Bobojonov o‘z sahifasiga UzReport TV murojaatini ham joylashtirgan. Unda restoran, kafe va klub egalariga manfaatli taklif berilgan bo‘lib, Yevropa Chempionati musobaqasini bepul namoyish qilish masalasi bo‘yicha 24-may kuni uchrashuv bo‘lib o‘tishi ko‘rsatilgan.

Bu borada sharhlovchi “Do‘stlar! Restoran, kafe va klub egalari bilan uchrashuv ulardan biror narsa talab qilish uchun emas, Yevro bo‘yicha ularga qo‘shimcha bonuslar berish uchun”, — deb xabar qoldirgan. Keyinroq esa kanal uchun muxlislarning futbol translyatsiyalaridan zavq olib, tomosha paytidagi e’tirofi kifoya qilishini aytib o‘tgan.

Ma’lumot uchun, O‘zMTRK “Sport” telekanali Braziliyada o‘tkazilgan futbol bo‘yicha 2014-yilgi Jahon Chempionati o‘yinlarini jamoat joylarda translyatsiya qilish narxini Toshkent shahri uchun O‘zbekiston Respublikasi Markaziy banki kursi bo‘yicha 1000 dollar, mamlakatning boshqa hududlarida efirga uzatish huquqini esa 500 dollar etib belgilagandi.