Футбол бўйича Евро—2016 мусобақасини Ўзбекистонда намойиш қилишнинг эксклюзив ҳуқуқини қўлга киритган UzReport TV телеканали учрашувларнинг оммавий жойларда намойиш этилиши учун пул талаб қилмайди. Бу ҳақда телеканалнинг «Спорт» таҳририяти бош муҳаррири Ёқубжон Бобожонов ўзининг Twitter саҳифасида маълумот берди.
Ёқубжон Бобожонов ўз саҳифасига UzReport TV мурожаатини ҳам жойлаштирган. Унда ресторан, кафе ва клуб эгаларига манфаатли таклиф берилган бўлиб, Европа Чемпионати мусобақасини бепул намойиш қилиш масаласи бўйича 24 май куни учрашув бўлиб ўтиши кўрсатилган.
Бу борада шарҳловчи «Дўстлар! Ресторан, кафе ва клуб эгалари билан учрашув улардан бирор нарса талаб қилиш учун эмас, Евро бўйича уларга қўшимча бонуслар бериш учун», — деб хабар қолдирган. Кейинроқ эса канал учун мухлисларнинг футбол трансляцияларидан завқ олиб, томоша пайтидаги эътирофи кифоя қилишини айтиб ўтган.
Маълумот учун, ЎзМТРК «Спорт» телеканали Бразилияда ўтказилган футбол бўйича 2014 йилги Жаҳон Чемпионати ўйинларини жамоат жойларда трансляция қилиш нархини Тошкент шаҳри учун Ўзбекистон Республикаси Марказий банки курси бўйича 1000 доллар, мамлакатнинг бошқа ҳудудларида эфирга узатиш ҳуқуқини эса 500 доллар этиб белгилаганди.
Изоҳ (0)