Xose Mariya Mendez: O‘zbekiston xalqi biz bilan faxrlanishi uchun qo‘limizdan kelgan barcha ishni bajaramiz

Bugun, 20-may tongida Kolumbiyaning Medelyin shahrida futzal bo‘yicha Jahon chempionatiga qur’a tashlash marosimi bo‘lib o‘tdi. Marosimdan so‘ng O‘zbekiston terma jamoasi bosh murabbiyi Xose Mariya Mendez qur’a haqidagi fikrlarini bildirib o‘tdi, deb xabar bermoqda O‘zbekiston futzal assotsiatsiyasi matbuot xizmati.

• Futzal bo‘yicha O‘zbekiston termasi JCh–2016 guruh bosqichida Kolumbiya, Portugaliya va Panamaga qarshi bahs olib boradi

“Guruhimizni turnirdagi eng qiyini deb bo‘lmaydi. Ikkinchi qiyin to‘rtlik desak, to‘g‘riroq bo‘ladi. Biz Kolumbiyaga qarshi o‘ynaymiz va ularning saviyasi yuqori ekanligini alohida e’tirof etish darkor. Jamoa o‘tgan mundialda yarim finalgacha yetib borganini yodda tutishimiz kerak. Portugaliya esa Yevropaning eng kuchli jamoalaridan biri hisoblanadi. Panama ham oson taslim bo‘ladiganlardan emas. Ular jismonan juda kuchli. Guruhimizda oson jamoaning o‘zi yo‘q. Birinchi o‘yinimiz Panama bilan, shu sababli ushbu bahsga ko‘proq e’tibor qaratamiz. Agar Portugaliya va Kolumbiya terma jamoalari bilan yaxshi o‘yin ko‘rsata olsak, keyingi bosqichga chiqishimiz mumkin. O‘zbekiston xalqi biz bilan faxrlanishi uchun qo‘limizdan kelgan barcha ishni bajaramiz”, – deb aytib o‘tdi Xose Mariya Mendez.

• Futzal bo‘yicha JCh–2016 turniri O‘zbekiston termasi ishtirokidagi o‘yin bilan boshlanadi

Eslatib o‘tamiz, futzal bo‘yicha 2016-yilgi Jahon Chempionati 10-sentabrdan 1-oktabrga qadar Kolumbiyada bo‘lib o‘tadi.

• Futzal bo‘yicha jahon chempioni 250 ming dollarni qo‘lga kiritadi