Хосе Мария Мендез: Ўзбекистон халқи биз билан фахрланиши учун қўлимиздан келган барча ишни бажарамиз

Бугун, 20 май тонгида Колумбиянинг Меделйин шаҳрида футзал бўйича Жаҳон чемпионатига қуръа ташлаш маросими бўлиб ўтди. Маросимдан сўнг Ўзбекистон терма жамоаси бош мураббийи Хосе Мария Мендез қуръа ҳақидаги фикрларини билдириб ўтди, деб хабар бермоқда Ўзбекистон футзал ассоциацияси матбуот хизмати.

• Футзал бўйича Ўзбекистон термаси ЖЧ–2016 гуруҳ босқичида Колумбия, Португалия ва Панамага қарши баҳс олиб боради

«Гуруҳимизни турнирдаги энг қийини деб бўлмайди. Иккинчи қийин тўртлик десак, тўғрироқ бўлади. Биз Колумбияга қарши ўйнаймиз ва уларнинг савияси юқори эканлигини алоҳида эътироф этиш даркор. Жамоа ўтган мундиалда ярим финалгача етиб борганини ёдда тутишимиз керак. Португалия эса Европанинг энг кучли жамоаларидан бири ҳисобланади. Панама ҳам осон таслим бўладиганлардан эмас. Улар жисмонан жуда кучли. Гуруҳимизда осон жамоанинг ўзи йўқ. Биринчи ўйинимиз Панама билан, шу сабабли ушбу баҳсга кўпроқ эътибор қаратамиз. Агар Португалия ва Колумбия терма жамоалари билан яхши ўйин кўрсата олсак, кейинги босқичга чиқишимиз мумкин. Ўзбекистон халқи биз билан фахрланиши учун қўлимиздан келган барча ишни бажарамиз», – деб айтиб ўтди Хосе Мария Мендез.

• Футзал бўйича ЖЧ–2016 турнири Ўзбекистон термаси иштирокидаги ўйин билан бошланади

Эслатиб ўтамиз, футзал бўйича 2016 йилги Жаҳон Чемпионати 10 сентябрдан 1 октябрга қадар Колумбияда бўлиб ўтади.

• Футзал бўйича жаҳон чемпиони 250 минг долларни қўлга киритади