Qozog‘istonning Chimkent shahrida ITF turkumiga kiruvchi, sovrin jamg‘armasi 10 ming AQSh dollaridan iborat Shymkent Open tennis turnirining asosiy to‘r bahslari start oldi. Unda bir qator o‘zbekistonlik tennischilar ham o‘z imkoniyatlarini sinovdan o‘tkazyapti, deb xabar beradi “Olamsport”.
Musobaqaning birinchi raketkasi sifatida tasniflangan o‘zbekistonlik Sabina Sharipova ilk davrada mezbonlar vakilasi Arina Taluenkoni ortiqcha qiyinchiliksiz 6:1, 6:1 hisobida mag‘lub etdi. Sabinaning ikkinchi bosqichdagi raqibi rossiyalik Yekaterina Kazionova bo‘ladi.
Yana bir o‘zbekistonlik iste’dodli tennischi Arina Fols esa rossiyalik Nonna Kurginyandan 6:2, 6:4 hisobida ustun keldi. 19 yoshli Arina ikkichi davrada Karine Sarkisova (Rossiya) hamda Ilona Kremen (Belarus) uchrashuvi g‘olibiga qarshi kortga chiqadi.
Bugun, 26-aprel kuni o‘zbekistonlik tennischilardan Komola Umarova va Laylo Bahodirova turnirdagi ilk uchrashuvini o‘tkazadi.
Ma’lumot o‘rnida, Sabina Sharipova 11–17-aprel kunlari Xitoyning Shenchjen shahrida bo‘lib o‘tgan, mukofot jamg‘armasi 50 ming dollarga teng ITF turkumidagi tennis turnirining yarim finaliga qadar yetib borgan edi.
Izoh (0)