Facebook’dagi “Potrebitel.uz” guruhida ishtirokchilardan birining yo‘lovchilar to‘la avtobusda chekayotgan haydovchi haqidagi chiqishi chop etilib, unga avtobus raqami ko‘rinib turgan foto ham ilova etildi. Bu haqda “Potrebiteli.uz” xabar bermoqda.
Chiqishga O‘zbekiston Respublikasi xususiylashtirish, monopoliyadan chiqarish va raqobatni rivojlantirish davlat qo‘mitasi reklama faoliyati ustidan nazorat va iste’molchilar huquqini himoya qilish boshqarmasi xodimlari e’tibor qaratdi. Ular guruhda chop etilgan materialni vaziyatga oydinlik kiritish uchun “Toshshahartransxizmat”ga yubordi.
Avtobus haydovchisi topilib, yo‘lovchi transportini boshqarish chog‘ida chekkanligi tasdiqlandi. Unga o‘rtacha oylik maoshining 20 foizi miqdorida jarima solindi va boshqa yo‘nalishga o‘tkazildi.
“Endi 12-avtobus saroy haydovchilari avtobus salonida chekishga jur’at etmasa kerak, chunki guruh ishtirokchilari mobil telefonlari kamerasi nishonida va qo‘mita xodimlari nazoratida ekanliklarini yaxshi biladi”, — deb yozadi “Potrebiteli.uz”.
Izoh (0)