O‘zbekiston Respublikasi Davlat soliq qo‘mitasida aholiga pullik transport xizmati ko‘rsatishni yanada takomillashtirishga bag‘ishlangan video-seminar bo‘lib o‘tdi. Bu haqda O‘zA xabar bermoqda.
Seminarda ta’kidlanganidek, 2016-yil 1-yanvaridan transport xizmatini ko‘rsatuvchi mikrofirma va kichik korxonalar uchun yagona soliq to‘lovining 5 foizlik stavkasi joriy etildi, kichik korxonalar uchun xodimlar soni 25 tadan 50 taga oshirildi.
O‘zbekistonda ikki yarim mingga yaqin transport korxonasida qariyb 61 ming transport vositasi mavjud. Shundan 31,4 mingtasi yengil avtomobildir. Tarmoqda 90 mingdan ziyod ishchi-xodim faoliyat ko‘rsatmoqda.
O‘zbekiston Respublikasi Vazirlar Mahkamasining 2011-yil 18-maydagi “Yo‘nalishsiz taksilar faoliyatini tartibga solish chora-tadbirlari to‘g‘risida”gi qaroriga muvofiq, har bir transport vositasi muayyan talablarga javob berishi, jumladan, litsenziya kartochkasi, taksometr, davlat soliq xizmati organlarida ro‘yxatdan o‘tkazilgan nazorat-kassa mashinasi va bank plastik kartochkalaridan to‘lovlar qabul qilish bo‘yicha to‘lov terminali bilan jihozlangan bo‘lishi lozim.
Yo‘nalishsiz taksilar faoliyatini tartibga solish, avtotransport vositalarida aholiga noqonuniy xizmat ko‘rsatishning oldini olish maqsadida davlat soliq xizmati organlari tomonidan tegishli tashkilot va idoralar bilan hamkorlikda nazorat tadbirlari o‘tkazib kelinmoqda. 2016-yilning o‘tgan davrida o‘tkazilgan shunday tadbirlar davomida 7 ming 500 jismoniy shaxs noqonuniy faoliyat bilan shug‘ullanayotgani aniqlangan. Mazkur nazorat tadbirlari aholiga ko‘rsatilayotgan transport xizmatlari sifatini yanada yaxshilash, harakat xavfsizligini ta’minlash, tadbirkorlik subyektlarining qonuniy faoliyat ko‘rsatishi uchun yaqindan yordam ko‘rsatishga qaratilgan.
Seminarda tadbirkorlar tomonidan bildirilgan fikr va takliflar o‘rganildi. Ishtirokchilarning savollariga mutasaddi idoralar vakillari javob qaytardi.
Izoh (0)