Samsung янги флагманлари — Galaxy S7 ва S7 Edge’ни намойиш этди, дея хабар бермоқда TJournal.
5,1 дюймли Galaxy S7’нинг дизайни аввалги моделникидан кўп ҳам фарқ қилмайди: фақат бармоқ изи датчиги ва орқа камера туртиб чиққан жой анча яссироқ кўриниш олди. Galaxy S7 Edge 5,5 дюймли экранга эга бўлди, шунингдек, унинг орқа корпуси бироз қайрилган бўлиб, бу уни қўлда тутиб туриш учун қулайлик яратади.
Ҳар иккала смартфон ҳам IP68 стандарти бўйича намликдан ҳимояланган бўлиб, улар 1,5 метргача чуқурликдаги сувда ярим соатгача туриши ва ҳеч қандай зиён кўрмаслиги мумкин.
S7 Edge’дан битта бармоқ орқали фойдаланиш қулайроқ бўлиши учун, Samsung ўз дастурий қобиғига ён менюни қўшди, у бармоқ экран бўйлаб юргизилганида ўнг томонда пайдо бўлади.
Смартфонларнинг техник хусусиятлари тақдимотдан аввалроқ маълум қилинган эди. Samsung аккумуляторлар ҳажмини S7’да 2550 мА/соатдан 3000 мА/соатгача, S7 Edge’да 2600 мА/соатдан 3600 мА/соатгача оширди. Шунингдек, камералар аввалгидек 16 мегапиксель эмас, 12 мегапикселли бўлди, бироқ уларнинг ёруғликка нисбатан сезувчанлиги ортди, бу суратлар сифатини оширади.
Изоҳ (0)