Zangiota tumani hokimi Sodiq Abdullayev Toshkent viloyati hokimi etib tayinlandi

Toshkent viloyati hokimi Ahmadjon Usmonov lavozimidan ozod etildi. Bu haqda “O‘zbekiston” telekanali “Axborot” informatsion dasturida xabar berildi.

4-fevral, payshanba kuni xalq deputatlari Toshkent viloyat Kengashining navbatdan tashqari sessiyasi bo‘lib o‘tgan. Unda O‘zbekiston Prezidenti Islom Karimov qatnashgan, sessiyada tashkiliy masala ko‘rilgan.

Xabar berishlaricha, xalq deputatlari Toshkent viloyat Kengashining qaroriga muvofiq shu kungacha Zangiota tumaniga hokimlik qilib kelgan Sodiq Abdullayev viloyatning yangi hokimi etib tasdiqlangan.

Shu kunning o‘zida O‘zbekiston Prezidenti Islom Karimov Sodiq Abdullayevni Toshkent viloyati hokimi etib tayinlash to‘g‘risidagi farmonni imzolagan.

Shu bilan birga, O‘zbekiston Prezidentining boshqa farmoniga muvofiq, viloyatning avvalgi hokimi Ahmadjon Usmonov o‘z lavozimidan ozod etildi.