Yozgi ta’til bu bolalarning maktabdan dam olib, yorqin his-tuyg‘ular va kutilmagan ko‘nikmalar olamiga sho‘ng‘ishi uchun ajoyib fursat hisoblanadi. Film tomosha qilish bo‘sh vaqtni mazmunli o‘tkazishning eng yaxshi usullaridan biridir. Kino ularga nafaqat ko‘ngilochar, balki boshqa olamlarga eshik ochuvchi portal bo‘lib, ajoyib qahramonlar bilan uchrashib, hayratlanarli sarguzashtlarni boshdan kechirish imkonini beradi. Maqolada minglab tomoshabinlar tomonidan sinovdan o‘tgan filmlar ro‘yxati haqida so‘z boradi.
“Narniya saltanati: arslon, sehrgar ayol va sehrli shkaf”
2005-yilda rejissyor Endryu Adamson tomonidan suratga olingan epik fantaziya filmning asosiy manbasi Klayv Luisning shu nomli kitobidir. Filmda bosh qahramonlar Piter, Suzan, Edmund va Lusi Pevensi, ular berkinmachoq o‘yinini o‘ynayotgan paytda tasodifan sehrli shkafni topishadi. Shu shkaf orqali ular doimiy qish bilan qoplangan, yovuz Oq sehrgar ayol hukmronligidagi qorga burkangan Narniya saltanatiga tushib qoladi.
Syujet yorqin obrazlar va dramatik burilishlarga boy. “Narniya saltanati: arslon, sehrgar ayol va sehrli shkaf” filmining yaratuvchilari detallarni juda puxta ishlab chiqqan. Shuningdek, o‘rta asr liboslari va bezaklardan tortib, murakkab vizual effektlargacha, ular yordamida fantastik mavjudotlar jonlanadi va ulkan jang sahnalari yaratiladi. Oq sehrgar ayol rolini ijro etgan Tilda Svinton sovuq xarizmasi va qat’iyatli ko‘rinishi bilan tomoshabinlarning yodida qolgan.
“Garri Potter”
“Garri Potter” filmlari seriyasi XXI asr kinodagi eng yorqin va keng ko‘lamli hodisalardan biridir. Joan Roulingning sehrgar ekanini bilib olgan yetim bola haqidagi hikoyalari ko‘plab oilalar uchun haqiqiy an’ana bo‘lib qoldi.
2001-yildan 2011-yilgacha chiqqan sakkiz film bosqichma-bosqich Garri va uning do‘stlarining voyaga yetishini, qorong‘i kuchlarga qarshi kurashini hamda o‘tgan voqelik haqidagi haqiqatni izlashlarini tasvirlaydi. Asosiy seriya tugagach, 2016-yilda yangi franshiza — “Fantastik maxluqlar” boshlanib, u Potter olamidan 65 yil avvalgi voqealarni yoritadi.
“Betxoven”
1992-yilda suratga olingan “Betxoven” nomli oilaviy komediya 2000-yillarda ulg‘ayganlarning yozgi ta’tilida ajralmas qismga aylangan. Asosiy qahramon — katta va samimiy ko‘ppak Betxoven, u kutilmaganda Nyutonlar oilasiga kelib qo‘shiladi. U tezda bolalarning sevimlisiga aylanib, ko‘plab xavfli vaziyatlardan ularni qutqaradi, biroq o‘zi ham ba’zan muammoga duch keladi.
Brayan Levant rejissyorligi ostida yaratilgan film o‘zining samimiy hazillari, hayajonli lahzalari va to‘rt oyoqli bosh qahramonining xarizmasi bilan ajralib turadi. “Betxoven” iliq muhit va mehribon syujeti uchun tomoshabinlar tomonidan qadrlanadi.
“Sehrlangan Ella”
2004-yilgi romantik komediya Ella ismli qiz haqidagi voqeani hikoya qiladi. Ella bolalikdan o‘ziga xos xarakterga ega. U har qanday so‘rov yoki buyruqni o‘z xohish-istaklari va oqibatlaridan qat’i nazar bajarishga majbur. Qiz la’natdan qutulish maqsadida pari Lyusindani izlab sayohatga chiqishga ahd qiladi. Yo‘l davomida u g‘aroyib hamrohlarga duch keladi: so‘zlaydigan kitob, elf hamda taxtning jozibador va aqlli vorisi bo‘lmish shahzoda Char.
“Sehrlangan Ella” asari Zolushka haqidagi klassik ertakni shunchaki qayta hikoya qilish bilan cheklanmaydi, balki iroda erkinligi va tanlov qudrati mavzusiga yangicha qarash taklif etadi. Bosh qahramon kirishimli va jasur qiz bo‘lib, u barcha to‘siqlarni yengib o‘tib, o‘z taqdiri uchun kurashishni o‘rganadi.
“Malefisenta”
2014-yilgi Amerika fantastik filmi klassik “Uyqudagi go‘zal” ertagini yangidan talqin qildi. Asosiy syujet Malefisenta haqidagi hikoya atrofida aylanadi. U botqoqlikning sehrli olamida yashaydi, bolalikdan mehribon va kuchli bo‘ladi, lekin xiyonat tufayli hayoti tubdan o‘zgaradi. Malefisenta g‘azabga to‘lib, qasos olishga so‘z beradi.
Rejissyor Robert Strombergning filmi qahramonlarning murakkab munosabatlari bilan ajralib turadi. Malefisenta oddiy yovuz jodugarga o‘xshamaydi, u rolini og‘riq va xiyonat bilan ochib beradigan qahramondir. Anjelina Joli bosh rolni ijro etib, vahimali, lekin hamdardlik uyg‘otadigan obraz yaratgan.
“Charli va shokolad fabrikasi”
Bosh qahramon Charli Baket kambag‘al oilada, kichkina kulbada ota-onasi, buvisi va buvalari bilan yashaydi. Villi Vonka esa shokolad fabrikasining g‘ayrioddiy egasi bo‘lib, o‘z fabrikasiga borish va umrbod shirinliklar bilan ta’minlanish imkonini beruvchi tanlov e’lon qiladi. Tanlovda Charli g‘olib bo‘lib, haqiqiy ertaknamo olamga tushib qoladi.
Film rejissyor Tim Bertonning betakror uslubi, noodatiy sahna bezaklari va yodda qoladigan musiqiy chiqishlari bilan ajralib turadi. Vonka rolidagi Jonni Depp sirli va g‘alati dahoga xos obrazni yaratgan bo‘lib, tomoshabinda bir paytning o‘zida hamdardlik va biroz hayratni uyg‘otadi. “Charli va shokolad fabrikasi” — mehr, kamtarlik va oila qadriyatlari haqida hikoya qiluvchi ertakdir.
“Qat’iy tartibli ta’til”
Rossiyalik rejissyor Ivan Popovning ushbu komediyasi aynan bolalar uchun mo‘ljallanmagan bo‘lsa-da, ayniqsa o‘smirlar va bolaligida yozgi lagerlarni sevganlar uchun juda yoqimli film hisoblanadi. “Qat’iy tartibli ta’til” — ikki mahbusning noodatiy hikoyasi bo‘lib, ular qochqinlikda bolalar lageriga yashirinadi va o‘zlarini sardorlar sifatida ko‘rsatishga majbur bo‘ladi.
Film hazil-mutoyiba, iqtiboslar va sovet davridagi “Omadli jentlmenlar”, “Shurikning sarguzashtlari” kabi mashhur komediyalarga ishoralar bilan to‘la. Bu turli olamlardan kelgan odamlar o‘zaro til topishga majbur bo‘lgan ssenariy orqali insoniy munosabatlarga samimiy va hayotiy qarashdir. Qahramonlar bir biriga nisbatan ishonchni o‘rganadi, bolalar esa yangi sardorlarida chin do‘st va murabbiylarni ko‘ra boshlaydi.
“So‘nggi bahodir” va uning davomiy qismlari
Rossiyada suratga olingan ushbu sarguzasht film ertak janridagi haqiqiy kashfiyot bo‘ldi. Asosiy qahramon — Ivan Naydenov, Moskvada yashovchi oddiy yigit bo‘lib, tashqi tomondan farovon hayot kechirayotgandek ko‘rinsa-da, aslida yolg‘iz o‘sgan va bolalar uyida tarbiyalangan. Bir kuni quvg‘indan qochayotgan paytda u akvaparkdagi suv quvurlaridan biriga sho‘ng‘iydi va kutilmaganda sehrli Belogorye olamiga tushib qoladi. Bu yerda rus ertaklarining qahramonlari yashaydi va sehr oddiy hayotning bir qismiga aylangan.
“So‘nggi bahodir” filmi va uning ssenariy bo‘yicha davom etgan qismlari — “So‘nggi bahodir: yovuzlik ildizi” hamda “So‘nggi bahodir: zulmat elchisi” — sarguzashtli jangovar, komediya va ertak janrlarini o‘zida birlashtirgan. Yalmog‘iz kampir, o‘lmas Kashey, Suv parisi kabi mashhur obrazlar ishtirok etgan bu kartinalar so‘nggi yillarda eng ko‘p tomosha qilingan rus filmlari qatoridan joy oldi.
“Cheburashka”
Izoh (0)