“Haqiqat” gazetasi Yuridik universiteti kafedra mudiri Otabek Mahkamovning maqolasiga kinoaktyor Otabek Mahkamovning suratini bosib chiqardi

Andijon viloyatida chop etiluvchi “Haqiqat” gazetasi O‘zbekiston Konstitutsiyasi haqidagi maqola muallifi suratini adashtirib yubordi. Gazetaning xatolik bilan nashrdan chiqqan sahifasi ijtimoiy tarmoqlarda tarqalib ketgan.

Ma’lum bo‘lishicha, gazetadagi “Konstitutsiya — kichik biznes va xususiy tadbirkorlik faoliyatining huquqiy asosi” nomli maqola Toshkent Davlat yuridik universiteti “Jinoyat huquqi va kriminologiya” kafedrasi mudiri, yuridik fanlar doktori Otabek Mahkamov tomonidan yozilgan.

Biroq gazetada kafedra mudirining o‘rniga, “Vikipediya” ma’lumotlariga ko‘ra, aktyor va huquqshunos sanalgan Otabek Mahkamovning surati chop etilgan. Qayd etish joiz, Otabek Mahkamov o‘nlab milliy filmlarda rol ijro etgan, taniqli xonandalarning kliplarida obrazlar yaratgan.