Bahodir Nasimov “Bunyodkor” klubi bilan shartnoma imzoladi

Toshkentning “Bunyodkor” jamoasi o‘z tarkibiga tajribali hujumchi Bahodir Nasimovni qo‘shib oldi. Bu haqda klub matbuot xizmati xabar bermoqda.

Ma’lum vaqt jamoa mashg‘ulotlarida qatnashib, murabbiylar shtabida iliq taassurot qoldirgan Bahodir Nasimov va klub o‘rtasida bitim imzolandi.

Bahodir katta futbolga Samarqandning “Dinamo” jamoasi orqali qadam qo‘ygan. Bu jamoadagi olti yillik faoliyatidan so‘ng Nasimov 2009-yilning boshlarida “Bunyodkor”da paydo bo‘ldi. “Qaldirg‘ochlar” bilan MDH kubogida ishtirok etib, beshta gol bilan musobaqaning eng yaxshi to‘purarlaridan biri bo‘ldi. Shundan so‘ng u Qozonning “Rubin” klubi bilan uch yillik shartnoma tuzdi.

Nasimov 2010-yilning yozida Bokuning “Neftchi” jamoasiga o‘tdi. U bokuliklar safida uch karra Ozarbayjon chempionligini, ikki bor mamlakat kubogini qo‘lga kiritdi. 2011/12-yilgi mavsumda esa 16 ta goli bilan Ozarbayjon chempionatining eng yaxshi to‘purari bo‘ldi.

Hujumchi 2014/15-yilgi mavsumning birinchi qismini Eronning “Padideh” klubida o‘tkazdi.

U O‘zbekiston milliy terma jamoasi safida 20 ta uchrashuvda maydonga tushib, raqiblari darvozasiga 5 ta gol urgan.