Rossiyalik taniqli milliarderning o‘g‘li onasini bo‘g‘ib o‘ldirganlikda gumon qilinmoqda
Tatariston poytaxti Qozondagi “Korston” memonxonasidagi xonalardan biridan 44 yoshli ayolning o‘ligi topildi. Jinoyatni sodir etishda gumon qilinib, ayolning 19 yoshli o‘g‘li qo‘lga olindi. Bu haqda “Vesti” xabar bermoqda.
Dastlabki ma’lumotlarga ko‘ra, 10-dekabr kuni ayol o‘g‘li bilan Moskvadan Qozonga treningda qatnashish uchun kelgan. Shu kuni kechki payt mehmonxonada yashayotganlardan biri yo‘lakda kiyimida qon izlari bo‘lgan gumonlanuvchini ko‘rgan va mehmonxona xodimlarini chaqirgan. Ular xonada yuzi qontalash, tanasida bo‘g‘ish alomatlari bo‘lgan jasadga duch kelgan. Ayol quvvatlantiruvchi qurilma simi bilan bo‘g‘ilgan bo‘lishi mumkinligi bildirilmoqda.
LifeNews ma’lumotlariga ko‘ra, fojia milliarder, “Starik Xottabich” do‘konlar tarmog‘i egasi va OBI aksiyadori Igor Sosinning sobiq oilasida sodir bo‘lgan. Qotillikda uning 19 yoshli o‘g‘li Yegor gumon qilinmoqda. Uning onasi bilan milliarder bir necha yil avval ajrashgan.
Yegor tergovchilarga onasi bilan Moskvadan Qozonga davolanish uchun kelgani, u bergan dorilar tufayli hushi o‘zida bo‘lmagani, qanday qilib onasini urgani va bo‘g‘ganini eslolmasligini hikoya qilgan. Tergov qo‘mitasining respublika boshqarmasi xodimlari fojianing barcha sabab va tafsilotlariga oydinlik kiritishga kirishdi.
