“O‘ztemiryo‘lyo‘lovchi” 11-yanvargacha jo‘naydigan xalqaro qatnov poyezdlari uchun chegirmalar joriy qildi

“O‘ztemiryo‘lyo‘lovchi” AJ ma’muriyati 2016-yil uchun yo‘l hujjatlari qachon sotilganidan kelib chiqib chegirmalar o‘rnatilganini e’lon qildi, deb yozadi “Review.uz”. Ular 2015-yil 10-dekabrdan boshlab sotiladigan va 2016-yil 11-yanvargacha jo‘naydigan poyezdlar uchun mo‘ljallangan chiptalar uchun amal qiladi.

Rossiya Federatsiyasi va Qozog‘iston Respublikasi o‘rtasida to‘g‘ridan-to‘g‘ri qatnaydigan xalqaro qatnov poyezdlari va ular bilan boradigan ovushmaydigan (peresadkasiz) va tirkama xalqaro qatnov vagonlarida quyidagi chegirmalar kiritiladi:

1. Kupe vagonlari va yotib ketiladigan vagonlar uchun platskarta narxi va tarifning chipta qismi uchun quyidagi hajmda chegirmalar joriy qilinadi:

• yo‘l hujjatlari poyezd jo‘nab ketishidan 45—31 sutka oldin sotib olinsa — 45%;
• yo‘l hujjatlari poyezd jo‘nab ketishidan 30—6 sutka oldin sotib olinsa — 35%.

2. Platskartali vagonlar uchun platskarta narxi va tarifning chipta qismi uchun quyidagi hajmda chegirmalar joriy qilinadi:

• yo‘l hujjatlari poyezd jo‘nab ketishidan 45—31 sutka oldin sotib olinsa — 35%;
• yo‘l hujjatlari poyezd jo‘nab ketishidan 30—6 sutka oldin sotib olinsa — 25%.

3. Yo‘l hujjatlari poyezd jo‘nab ketishidan 5 yoki undan kam sutka oldin sotib olinsa, platskartali, kupeli va yotib ketiladigan vagonlar uchun platskarta narxi va tarifning chipta qismi uchun 5 foizli ustama puli qo‘yiladi.