AQSh prezidentligiga respublikachilar partiyasidan nomzod, milliarder Donald Trampning Buyuk Britaniyaga kirishini taqiqlash to‘g‘risidagi onlayn-petitsiyani 100 mingdan ortiq britaniyalik imzoladi. Bu haqda “TASS” xabar beradi.

Shu tariqa Britaniya parlamenti saytiga joylashtirilgan jamoat so‘rovi uning quyi palatasida ko‘rib chiqilishi lozim.

Diqqatga molik jihati shundaki, ushbu petitsiyaning joylashtirilganligiga bir sutkadan kamroq vaqt o‘tdi. U 8-dekabr kuni joylashtirilgan edi. Hozirgi paytda siyosatchining teraktlar va amerikaliklarga nisbatan shafqatsizliklarning oldini olish uchun AQShga barcha musulmonlarning kirib kelishini to‘liq cheklash haqidagi undovi yuzasidan har daqiqada petitsiyani imzolab, 500 ga yaqin kishi o‘zining noroziligini bildirmoqda.

Trampning Britaniya poytaxtiga nisbatan bildirgan tanqidiy fikri unga nisbatan norozilik kayfiyatini yanada kuchaytirdi. U London aholisi uning musulmonlar yashovchi ba’zi hududlarining o‘ta radikallashganligidan qo‘rqishini ma’lum qilgan edi.