АҚШ президентлигига республикачилар партиясидан номзод, миллиардер Дональд Трампнинг Буюк Британияга киришини тақиқлаш тўғрисидаги онлайн-петицияни 100 мингдан ортиқ британиялик имзолади. Бу ҳақда «ТАСС» хабар беради.

Шу тариқа Британия парламенти сайтига жойлаштирилган жамоат сўрови унинг қуйи палатасида кўриб чиқилиши лозим.

Диққатга молик жиҳати шундаки, ушбу петициянинг жойлаштирилганлигига бир суткадан камроқ вақт ўтди. У 8 декабрь куни жойлаштирилган эди. Ҳозирги пайтда сиёсатчининг терактлар ва америкаликларга нисбатан шафқатсизликларнинг олдини олиш учун АҚШга барча мусулмонларнинг кириб келишини тўлиқ чеклаш ҳақидаги ундови юзасидан ҳар дақиқада петицияни имзолаб, 500 га яқин киши ўзининг норозилигини билдирмоқда.

Трампнинг Британия пойтахтига нисбатан билдирган танқидий фикри унга нисбатан норозилик кайфиятини янада кучайтирди. У Лондон аҳолиси унинг мусулмонлар яшовчи баъзи ҳудудларининг ўта радикаллашганлигидан қўрқишини маълум қилган эди.