Дубай фуқаролик ҳимояси хизмати ўт ўчирувчилар учун учувчи реактив қурилма сотиб олди. Бу осмонўпар биноларнинг юқори қаватларига тез ва хавфсиз чиқиш имконини беради, дея хабар беради National Geographic.
Дубай фуқаролик ҳимояси хизмати Янги Зеландиянинг Martin Aircraft компанияси томонидан ишлаб чиқилган 20 та жетпак ва иккита машғулот симуляторини харид қилди. Martin Jetpack 120 килограммгача оғирликни кўтара олади, тезлиги соатига 74 километрни ташкил этади, 45 литр бензин ярим соат ишлашига етади. Бу учувчи қурилма тўрт цилиндрли двигатель ёрдамида ҳаракатга келади.
Гарчи аслида реактив бўлмаса-да, ҳозирга келиб бундай номланиш инсонга ҳавога кўтарилиш имконини берадиган рюкзак кўринишидаги барча қурилмалар учун умумий бўлиб қолди. Martin Jetpack ёрдамида вертолёт қўна олмайдиган тор, энсиз майдонларга ҳам вертикал равишда парвоз қилиш ва қўниш мумкин. Бундай қурилма минг метргача бўлган баландликка кўтарилишга имкон беради.
Салкам 1000 га яқин осмонўпар бинолари бор шаҳар учун бундай қурилмага эга бўлиш муҳим аҳамият касб этади.
Изоҳ (0)