Jahondagi eng qiziqarli 9 bayroq (foto)

Dunyo istalgan mamlakat, hududni uning bayrog‘i orqali taniydi. Bayroq, xuddi inson chehrasi misol, o‘zida mamlakatning turmushi, o‘tmishi va buguni haqida dastlabki va ko‘pincha aniq tasavvurlarni taqdim etadi.

18-noyabr — O‘zbekistonning milliy ramzlaridan biri — davlat bayrog‘i qabul qilingan kun. Bu yil xalqaro maydonda mustaqil O‘zbekiston bayrog‘i hilpirab turganiga 24 yil to‘ldi.

Shubha yo‘qki, o‘zbekistonliklar uchun O‘zbekiston bayrog‘idan-da go‘zalroq va yuksakroq tug‘ yo‘q. Quyida keltirilgan bayroqlar esa o‘zining qiziqarli ko‘rinishi bilan kishi e’tiborini tortadi.

Mozambik

Mozambik — bayrog‘ida zamonaviy jangovar qurol (“Kalashnikov” avtomati) aks etgan jahondagi yagona mamlakatdir.

Men oroli

Buyuk Britaniya tojiga bo‘ysunuvchi Men orolining bayrog‘iga oxirgi marta XIII asr ikkinchi yarmida o‘zgartirish kiritilgan, rasman 1971-yil 27-avgustda qabul qilingan.

Nepal

Ko‘rinishi klassik to‘rtburchak bo‘lmagan jahondagi yagona bayroq. Bayroqdagi uchburchaklar ichida oy va quyosh tasvirlangan.

Svazilend

1967-yilda tasdiqlangan Afrikadagi Svazilend qirolligi bayrog‘ida oq-qora rangli qalqon bo‘lib, u oq va qora tanlilarning birgalikdagi tinch-totuv hayoti ramzidir.

Papua-Yangi Gvineya

Jannat qushining tasviri bor Papua-Yangi Gvineya bayrog‘i dizayni 15 yoshli o‘quvchi qiz Syuzen Xuxume tomonidan chizilgan.

Butan

2002-yili o‘tkazilgan so‘rovnoma natijalariga ko‘ra, Butan bayrog‘i jahonda eng yaxshisi deb topilgan.

Shri-Lanka

Shri-Lanka bayrog‘idagi yashil va olovrang chiziqlar mamlakatdagi musulmon va hinduiy ozchilikning ramzi hisoblanadi.

Seyshel orollari

Bayroqdagi ko‘k rang — dengiz, sariq rang — quyosh, qizil — birdamlik, oq — huquq ustuvorligi, yashil esa tabiatni bildiradi.

Lombardiya (Italiyadagi viloyat)

Bayroqda Val-Kamonika petrogliflari orasida eng mashhuri — “Kamuna atirguli” tasvirlangan. Olimlarning hisob-kitobiga ko‘ra, eng qadimiy “Kamuna atirguli” bronza davrida (miloddan 1200 yil avval) qoyalarga chizilgan.