Farg‘ona shahridagi Teatr-konsert saroyida ichki ishlar xodimlari uchun spektakl namoyish etildi, deya xabar bermoqda “Farg‘ona haqiqati” gazetasi.
Unda viloyat ichki ishlar boshqarmasi rahbariyati, shaxsiy tarkibi, yo‘l harakati xavfsizligi, yong‘in xavfsizligi, qo‘riqlash boshqarmalari, shuningdek, 10-tergov hibsxonasi, Farg‘ona, Marg‘ilon, Quvasoy shahar, Qo‘shtepa, Farg‘ona tumani IIB xodimlari ishtirok etdi.
“Shukrulla Hamdamov qalamiga mansub “Asl xazina” nomli jiddiy komediya spektakli Toshkentdan tashrif buyurgan aktyorlar Murod Rajabov, Muhammadiso Abdulxairov, Shohida Uzoqovalar tomonidan mohirona ijro etildi”, — deyiladi gazeta xabarida.
“Ushbu sahna asarida hayotimizda uchraydigan ayrim salbiy illatlar, voqealar, oilaviy munosabatlar mohirona talqin etilibdi”, – deydi viloyat IIB shaxsiy tarkib bilan ishlash xizmati boshlig‘i o‘rinbosari, mayor Azizbek Umarov. Uning fikricha, spektakl militsionerlarga ma’naviy ozuqa bo‘ldi.
Tadbir yakunida viloyat ichki ishlar boshqarmasi rahbariyati aktyorlarga minnatdorchilik bildirib, esdalik sovg‘alari topshirdi.
Izoh (0)