Parijda yuz bergan teraktlardan so‘ng, AQSh shtatlarining yarmidan ko‘pi Suriyadan kelayotgan qochoqlarni o‘z hududiga joylashtirish fikridan qaytdi. Ijtimoiy tarmoqlarda esa bunga javoban Apple kompaniyasi asoschisi Stiv Jobsning biologik otasi suriyalik ekani yodga olindi, deya xabar bermoqda TJournal.
16-noyabr kuni ma’lum bo‘lishicha, AQShning 50 shtatidan 39 tasi Suriyadan kelgan qochoqlarni o‘z hududiga joylashtirishga mutlaqo qarshi yoki faqat ba’zi bir shartlar bilan bunga rozilik bildirishi mumkin. Qochoqlarning ishonchli va xavfsiz ekanligini ayni vaqtda lozim darajada tekshirish imkoni borligiga gubernatorlarda shubha paydo bo‘lgan.
Xususan, Ayova gubernatori Terri Bransted AQShga qochoqlarning keyingi to‘lqini kelguniga qadar, tekshiruvlar qanday olib borilishi bilan bog‘liq barcha tafsilotlarni o‘rganishga qiziqish bildirdi. Ayni vaqtda, 1980-yilgi qonun bo‘yicha qochoqlarning shtatlar hududiga joylashishiga gubernatorlar qarshilik qila olmasligini ham tan oldi.
Sentabr oyida Oq uy matbuot kotibi Josh Ernest AQSh 2016-yilda kamida 10 ming nafar suriyalik qochoqni qabul qilishni rejalashtirayotganini ma’lum qilgandi. Qochoqlar uchun umumiy kvotani esa 75 ming kishigacha ko‘paytirish ko‘zda tutilgan (so‘nggi uch yildan beri kvota 70 ming ko‘rinishida saqlanib qolayotgandi).
130 ga yaqin odamning o‘limiga sabab bo‘lgan Parijdagi teraktlardan so‘ng vaziyat jiddiy keskinlashdi. Terrorchi-xudkushlardan birining yonidan 1990-yil 10-sentabr kuni Suriyaning Idlib shahrida tug‘ilgan Ahmad al-Muhammad nomiga berilgan pasport chiqqan.
Alohida shtatlarning ma’muriyatlari qochoqlarni qabul qilishdan bosh tortayotgani ma’lum bo‘lganidan so‘ng, shu zahoti ijtimoiy tarmoqlarda iPhone va iPad kabi aqlli mobil qurilmalarni ishlab chiqaruvchi Apple kompaniyasi asoschilaridan biri Stiv Jobs suriyalik insonning o‘g‘li ekanligi yodga olindi.
https://twitter.com/McFaul/status/666499475922403328
https://twitter.com/Moe_Jaber/status/666459534123110400
https://twitter.com/aavst/status/666508374855520256
https://twitter.com/golub/status/666507253076402176
Uolter Ayzekson tomonidan yozilgan tarjimai holga ko‘ra, Jobsning otasi Abdulfattoh “Jon” Jandaliy hisoblanadi. U haqiqatan ham Suriyada tug‘ilgan, biroq qochoq bo‘lmagan: uning oilasi neftni qayta ishlash zavodlari hamda Damashq va Xomsda yerlarga egalik qilgan, ko‘p kishilik oilaning yosh a’zolari Istanbul va Sorbonnada ta’lim olardi.
Abdulfattoh Jandaliy to‘qqiz o‘g‘ilning kenjasi bo‘lgan, u Bayrutdagi Amerika universitetida bakalavr darajasini olib, so‘ng Viskonsinda “siyosatshunoslik” mutaxassisligi bo‘yicha aspiranturaga kirgan. Shu yerda o‘qituvchining yordamchisi sifatida ishlab, Stiv Jobsning bo‘lajak onasi — germaniyalik muhojirlar oilasidan bo‘lgan Joan Shible bilan tanishgan.
Jobsning biologik ota-onalari Stiv boshqa bir oilaning qaramog‘iga berilganidan keyin oila qurib, bir necha yildan so‘ng ajrashib ketgan. Apple’ning bo‘lajak asoschisi esa mexanik Pol Jobs va uning ayoli Klara tarbiyasiga topshirilgan.
Biografning ta’kidlashicha, Stiv Jobs har doim Pol va Klarani o‘zining haqiqiy ota-onasi deb hisoblagan. O‘limidan ikki kun avval Jobs uni Palo-Altodagi Pol va Klaraning qabri yoniga dafn etishni so‘ragan.
Ijtimoiy tarmoqlarda fikr bildiruvchilar orasida Stiv Jobsning kelib chiqishi haqidagi dalilni e’tiborga arzimas deb hisoblovchilar ham topildi.
https://twitter.com/N_katin/status/666510032083775488
https://twitter.com/jeeratuall/status/666516722283843584
Izoh (0)