2015-yilning 4—6-oktabr kunlari tashqi ishlar, sog‘liqni saqlash, madaniyat va sport ishlari vazirliklari, Davlat bojxona qo‘mitasi, Yer resurslari, geodeziya, kartografiya va davlat kadastri davlat qo‘mitalari vakillaridan tashkil topgan O‘zbekiston Respublikasi delegatsiyasi Seul shahrida “Koreya Respublikasi – Markaziy Osiyo” to‘qqizinchi hamkorlik forumining majlisida ishtirok etdi. Bu haqda O‘zbekiston Tashqi ishlar vazirligi matbuot xizmati xabar bermoqda.
Ishtirokchi davlatlar delegatsiyalari sog‘liqni saqlash, geokenglik ma’lumotlari, bojxona ma’muriyati, madaniy aloqalar sohalaridagi hamkorlikning hozirgi holati va istiqbollari hamda Forum shaklida o‘zaro manfaatli hamkorlikni yanada kengaytirish bo‘yicha qo‘shma rejalarni muhokama qildi.
Forum doirasida Koreya Respublikasi va Markaziy Osiyo mamlakatlari ishbilarmon doiralarining 200 dan ortiq vakillari ishtirok etgan “Savdo-iqtisodiy va turistik roud-shou” ko‘rgazmasi bo‘lib o‘tdi.
O‘zbekiston delegatsiyasi Seul shahriga tashrif doirasida Koreya Respublikasi tashqi ishlar vazirining birinchi o‘rinbosari Cho Txe Yon bilan muzokaralar o‘tkazdi.
Muzokararlar chog‘ida ikki tomonlama munosabatlarni yanada rivojlantirishning istiqbolli yo‘nalishlari, oliy darajadagi O‘zbekiston—Janubiy Koreya uchrashuvlari davomida erishilgan kelishuvlarni amalga oshirish jarayoni ko‘rib chiqildi.
Izoh (0)