“Taxtlar o‘yini” seriali yilning eng yaxshi dramasi sifatida “Emmi” mukofotini qo‘lga kiritdi

Yozuvchi Jorj Martin asari asosida suratga olingan, fentezi janridagi “Taxtlar o‘yini” (Game of thrones) seriali AQShning eng yaxshi televideniye dasturlari mukofoti 67-“Emmi”ning bosh sovrindori bo‘ldi. Bu haqda “Gazeta.ru” xabar beradi.

Serial efirga uzatilayotgan besh yil mobaynida birinchi marta “eng yaxshi drama” nominatsiyasida g‘olib bo‘ldi.

Siyosiy janrdagi “Vitse-prezident” (Veep) eng yaxshi komediya deb topildi. Ta’kidlanishicha, har ikkala serial Time Warner tizimiga kiruvchi HBO telekanali orqali namoyish etiladi.

“Aqldan ozganlar” (Mad Men) teleserialidagi roli uchun Jon Xemm dramatik serialdagi eng yaxshi aktyor, “Qotillik uchun jazodan qutulib qolish” (How To Get Away With Murder) serialidagi roli uchun Viola Devis eng yaxshi aktrisa deb topildi.