“Daryo”ning Android platformasidagi smartfonlar hamda iPhone uchun mo‘ljallangan mobil dasturlari bir yildan oshiqroq vaqt davomida ishlab kelayotganidan xabaringiz bor. Endi esa ular qatoriga Windows Phone operatsion tizimida ishlovchi smartfonlar uchun dastur ham qo‘shildi.
To‘g‘ri, Android va iOS uchun chiqarilgan dasturlardan farqli ravishda ushbu ishlanma rasmiy emas. Biroq e’tiborli tomoni shundaki, uni “Daryo” mushtariylaridan biri — 9-sinf o‘quvchisi Aziz Yoqubjonov ishlab chiqqan.
Windows Phone 8’dan yuqori versiyalarda ishlovchi dasturda “Daryo” yangiliklarini o‘qish, alohida ruknlardagi xabarlarni ko‘rish mumkin. Shuningdek, kalit so‘zlar orqali kerakli yangilikni qidirish imkoniyati ham mavjud.
Windows Phone platformasida ishlovchi smartfonlar egalari dasturni Windows Phone Store’dan quyidagi havola orqali yuklab olishlari mumkin: goo.gl/GAhNJT.
Muallif haqida
Aziz Yoqubjonov Toshkent shahri Uchtepa tumanidagi 107-maktabning 9-sinfida o‘qiydi. “Ushbu dasturni yaratishda nashrning ko‘plab o‘quvchilariga yordam berish, shuningdek, dasturlash va dizayn bo‘yicha qobiliyatlarimni yaxshilash imkoniyati ilhom bo‘lib xizmat qildi”, — dedi Aziz.
Izoh (0)