KXDR Koreya yarim orolidagi vaziyat keskinlashuvi tufayli BMT Xavfsizlik Kengashini yig‘ishni yana talab qildi

Pxenyan 21-avgust, juma kuni Koreya yarim orolida vaziyat keskinlashuvi yuzasidan BMT Xavfsizlik Kengashi zudlik bilan yig‘ilishini talab qildi, deb yozadi “TASS”.

Xavfsizlik Kengashiga yo‘naltirilgan xatda KXDRning tashkilotdagi doimiy vakili Cha Son Nam keskinlik kuchayishi bo‘yicha javobgarlikni Vashington va Seulga yukladi hamda Shimoliy Koreya armiyasi qo‘shni mamlakatga qarata “birorta ham o‘q yoki snaryad otmagani”ni ta’kidladi.

Yarim orolda vaziyatning jiddiy keskinlashuvi 20-avgust, payshanba kuni KXDR va KR Qurolsizlantirilgan hududning g‘arbiy qismida bir-biriga artilleriyadan o‘q yog‘dirgach, sodir bo‘ldi. Janubiy Koreya ma’lumotlariga ko‘ra, o‘t birinchi bo‘lib, Shimol tomonidan ochilgan, bunga u yerga Seul tomonidan Pxenyanga qarshi targ‘ibot kampaniyasida foydalaniladigan radiokarnaylar joylangani sabab bo‘lgan. Biroq KXDR o‘z harbiylari birinchi bo‘lib o‘q yog‘dirganini rad etmoqda.