DTM saytida test natijalarini tekshirish xizmati ishga tushdi

Davlat test markazi saytida O‘zbekiston Oliy ta’lim muassasalariga kirish imtihonlari natijalarini tekshirish xizmati ishga tushdi. Xizmat result2015.dtm.uz manzilida joylashgan. Xizmat bepul bo‘lib, unda abituriyentlar javoblar varaqasi raqamini kiritish bilan imtihonda necha ball olgani va oliy o‘quv yurtiga kirgan yoki kirmagani haqida ma’lumot oladi.

Test natijalarini bilishni xohlovchilar ko‘pligi sabab, DTMning ushbu xizmati, shuningdek, SMS va Click orqali ko‘rsatiladigan xizmatlar yaxshi ishlamasligi yoki sekin ishlashi mumkin.

Eslatib o‘tamiz, O‘zbekiston Oliy ta’lim muassasalariga kirish imtihonlari natijalari 20-avgust kuni OTM hududlaridagi stendlarda e’lon qilinadi.

Ta’kidlash joiz, abituriyentlar imtihon natijalarini OTMga bormasdan — SMS orqali (Ucell va UzMobile abonentlari), Click tizimi, shuningdek, Telegram dasturi yordamida (kontaktlar ro‘yxatiga @DTMbot yoki @DTMrobot robotini qo‘shish va yo‘riqnomaga rioya etish kerak) bilishlari mumkin. Ko‘rsatib o‘tilgan usullarning bari pullik xizmatlardir.