Toshkentda 2022-yilgacha 1000 ta lift almashtiriladi

Toshkentda 2016—2021-yillarda shahar budjeti mablag‘lari hisobidan ko‘p xonadonli turar-joylardagi 1000 ta liftni almashtirish rejalashtirilmoqda, deya xabar berdi “Gazeta.uz”.

Liftlarni almashtirish dasturi O‘zbekiston hukumatining 10-avgustdagi qarori bilan tasdiqlandi. Dastur maqsadi aholi yashashi uchun qulay va xavfsiz sharoit yaratish, shuningdek, avariyali holatlar oldini olishdan iborat.

Loyihaning dastlabki qiymati 85,769 milliard so‘mdan oshadi. Dasturga ko‘ra, Bektemir tumanida 18 ta, Mirobod tumanida 83 ta, Mirzo Ulug‘bek tumanida 136 ta, Olmazor tumanida 62 ta, Sergeli tumanida 130 ta, Uchtepa tumanida 40 ta, Chilonzor tumanida 131 ta, Shayxontohur tumanida 114 ta, Yunusobod tumanida 121 ta, Yakkasaroy tumanida 58 ta va Yashnobod tumanida 107 ta liftni almashtirish ko‘zda tutilgan.