Qo‘qonlik tadbirkorning 60 million so‘m ipoteka krediti olganini eshitgan uning o‘rtog‘i plastik kartochkadagi pulni naqdlashtirib berishni va’da qilib, bir necha oyda 32 million so‘mni bo‘lib-bo‘lib berdi. Shu tariqa u og‘aynisining ishonchini “oqladi”, deb yozadi “Huquq” gazetasi.
Tadbirkor Turkiyaga savdo ishi bilan ketayotganida Spark avtomashinasini uning do‘sti “tirikchilik” uchun olib turdi. Ammo qaytib kelganida uning do‘sti mashinani garovga qo‘yib, 4 500 AQSh dollari qarz olganini, tez kunlarda avtoulovni qaytarib berishini aytdi. Tadbirkor uzoq vaqt o‘z do‘stidan quruq va’dalar olib yurganidan so‘ng, nihoyat og‘aynisi chuv tushirganini tushunib yetdi.
Nashr qayd etishicha, dastlabki tergovda firibgar boshqa bir odamni ham aldab yurgani ma’lum bo‘ldi. U Qo‘qon shahri, Mushtariy ko‘chasida ikkita uyini sotmoqchi bo‘lgan odamni chuv tushirgan. Firibgar 150 million so‘mga baholangan uyni sotib olishini, kredit olishga puli yetmayotganini aytgan va do‘stiga tegishli Spark mashinasini garovga qo‘yib, uy sohibidan qarz olgan.
Sud majlisida firibgar aybiga iqror bo‘ldi. U uyini sotmoqchi bo‘lgan kishining 69 500 000 so‘m, do‘stining 27 500 000 so‘m pulini firibgarlik bilan qo‘lga kiritganligi ma’lum bo‘ldi. Sud sudlanuvchidan jabrlanuvchilarga yetkazilgan zararni undirgan holda, uni besh yil muddatga ozodlikdan mahrum etishga hukm qildi.
Izoh (0)