Urgut shahridagi markaziy Temirchilar (sobiq Sobir Rahimov) ko‘chasi, savdo qoidalariga zid ravishda, yo‘lda tirbandliklarni yuzaga keltirgan holda, qishloq xo‘jaligi mahsulotlari bilan savdo qiluvchilar tomonidan bozorga aylantirib olingan, deya xabar bermoqda “Samarkandskiy vestnik” gazetasi.
“Vaholanki, bu yerdan ikki qadam narida butun bir dehqon bozori huvillab yotibdi”, — deyiladi gazetadagi maqolada. Yo‘l chetini qishloq xo‘jaligi mahsulotlari, poliz ekinlari bilan savdo qiluvchi katta yuk mashinalari egallab olgani piyodalarning, ayniqsa, qatnov qismi yonidagi 54-maktab o‘quvchilari hayotini xavf ostida qoldirmoqda.
“O‘z vaqtida bu yerda avtomobillarning to‘xtashini taqiqlovchi belgi bor edi, biroq hozirda u daraxtlarning shox-shabbalari ortida qolib ketgan. Bundan tashqari, atrof sanitariya talablariga zid ahvolda, har yoqda tarvuz va qovun po‘choqlari, yaroqsiz ahvoldagi pomidor, baqlajon, qovjirab ketgan ko‘katlarga to‘la. Bu ahvol qachongacha davom etadi?”, — deydi 54-umumta’lim maktabi direktori Anvar Yorboboyev.
Izoh (0)