O‘zbekistonda yaqin oylarda kuchli zilzilalar kutilmayapti, deya xabar bermoqda “Gazeta.uz” respublika Fanlar akademiyasi Seysmologiya instituti direktor o‘rinbosari Ahmadjon To‘ychiyevga tayanib.
“Institut mutaxassislari tomonidan yer qa’rining holati yil bo‘yi monitoring qilinib turibdi, u 20 ta turli parametrlar bo‘yicha olib boriladi. Mamlakatda zilzilalarni qayd etuvchi 50 ta seysmik stansiya, hamda 12 ta majmuali prognoz stansiyasi faoliyat yuritadi. Ayni paytda seysmik faollik kuchayganidan dalolat beruvchi alomatlar kuzatilmayapti”, — dedi u.
Ahmadjon To‘ychiyev ta’kidlashicha, O‘zbekiston shunday mintaqada joylashganki, u yerda doim zilzilalar bo‘lgan, bo‘lmoqda va bundan keyin ham bo‘ladi. Biroq hozirda aholining xavotir olishi uchun sabablar yo‘q.
Eslatib o‘tamiz, avvalroq Qirg‘iziston fanlar akademiyasi seysmologiya instituti joriy yili mamlakatning barcha hududlarida zilzila xavfi oshishini taxmin qilgan edi.
Izoh (0)