2015-yilning 17-iyul kuni O‘zbekiston Respublikasi tashqi ishlar Vaziri Abdulaziz Kamilov Yevropa tashqi faoliyat xizmatining Bosh kotibi o‘rinbosari Matsey Popovskini qabul qildi. Bu haqda O‘zbekiston TIV matbuot xizmati xabar bermoqda.
M.Popovski Kimyoviy, biologik, radiologik va yadroviy materiallar (KBRYaM) bo‘yicha ilg‘or tajriba markazlarining Markaziy Osiyo uchun Mintaqaviy kotibiyati rasmiy ochilish marosimida ishtirok etish uchun Toshkent shahriga tashrif buyurgan.
Uchrashuvda KBRYaM markazlari Mintaqaviy kotibiyatini tashkil etilishi Markaziy Osiyoni yadro qurolidan holi hududga aylantirish bo‘yicha O‘zbekiston tashabbusining maqsad va vazifalariga muvofiq kelishi ta’kidlandi.
Suhbat chog‘ida O‘zbekiston va Yevropa Ittifoqi o‘rtasidagi hamkorlikni, jumladan YeIning Markaziy Osiyo bo‘yicha Strategiyasini amalga oshirish doirasidagi aloqalarni yanada rivojlantirishning ustuvor yo‘nalishlari hamda xalqaro va mintaqaviy ahamiyatga ega boshqa masalalar muhokama qilindi.
Muzokaralarda YeI Delegatsiyasi boshlig‘i, elchi Yuriy Shterk ishtirok etdi.
Izoh (0)