Astrofiziklar Olamdagi eng yorqin galaktikani aniqlashdi
Astrofiziklar fazoviy Olamda shu vaqtga qadar kuzatilgan galaktikalar orasida eng yorqinini aniqlashdi. NASA saytida xabar berilishicha, u Quyoshga nisbatan 300 trillion marta ko‘proq nur taratadi.
WISE J224607.57-052635.0 galaktikasi Yerdan 12,5 milliard yorug‘lik yili masofada joylashgan. Olimlarning taxminicha, uning yorug‘ligi galaktika markazida haddan tashqari katta qora tuynuk borligi bilan bog‘liq, u o‘ziga materiyani tortadi va undan akkreatsion diskni shakllantiradi.
Bu diskdagi modda million darajagacha qizib ketadi va ko‘rinuvchi, ultrabinafsha va rentgen diapozonlarida nur taratadi. Tuynukni o‘rab olgan chang yorug‘likni o‘tkazmaydi, biroq u qizib ketganidan infraqizil diapozonda nur taratadi. Olimlarning qayd etishlaricha, shu sababli ham ular WISE J224607.57-052635.0’ni avvalroq ko‘ra olishmagan.
Eng yorqin galaktika 2010-yili Wide-field Infrared Survey Explorer (WISE) infraqizil teleskopi yordamida aniqlangan edi. U bilan birgalikda yana 19ta shunday faol yulduzga aylanish jarayonlari kechayotgan obyektlar aniqlangan.
Bu jihat ularni galaktikalarning yangi turiga – ekstremal darajada yorqin infraqizil galaktikalar guruhiga kiritishga asos bo‘ldi. Olimlarning fikricha, yorqin galaktikalarning qariyb yarmi infraqizil diapozonda nur taratadi.
