Futbol: O‘zbekiston U-20 terma jamoasi oldiga JCH-2015da yarim finalga chiqish vazifasi qo‘yildi
Toshkentda futbol bo‘yicha yoshlar o‘rtasidagi 2015 yilgi jahon chempionatida ishtirok etadigan O‘zbekiston yoshlar terma jamoasi bosh murabbiyi Ravshan Haydarov hamda jamoa sardori Javohir Sohibov ishtirokida matbuot anjumani bo‘lib o‘tdi. Bu haqda O‘FF matbuot xizmati xabar bermoqda.
30 may kuni Yangi Zelandiyada futbol bo‘yicha yoshlar o‘rtasidagi 2015 yilgi jahon chempionati start oladi. Unda O‘zbekiston yoshlar terma jamoasi “F” guruhida Germaniya, Fiji va Gonduras terma jamoalariga qarshi bahs olib boradi. Terma jamoa JCH-2015ga tayyorgarlikni dekabr oyida boshlab, besh oyda oltita yig‘in, 14ta o‘rtoqlik uchrashuvi o‘tkazdi
“Tayyorgarlik jarayonidan ko‘nglim to‘ldi. O‘zimizdan katta yoshdagi bir nechta terma jamoalar bilan, shuningek tengdosh jamoalardan Urugvay, Portugaliya kabi kuchli termalar bilan nazorat o‘yinlarida maydonga tushdik. Guruh bosqichidagi raqiblarni yaxshi o‘rganib chiqdik, deb ayta olaman. Ular ishtirokidagi o‘yinlarning videolari bizda bor edi. Diqqat bilan o‘rganib, tahlil qilib chiqdik va shunga yarasha tayyorgarliklarni olib bordik”, - dedi Ravshan Haydarov.
Terma jamoa murabbiylari yig‘inlar davomida 40dan ortiq futbolchilarni ko‘zdan kechirdi. Haydarovning qayd etishicha, Jamshid Boltaboyevning jarohat olgani tarkib uchun eng katta yo‘qotish bo‘ldi. Rossiyaning “Rubin” klubidan to‘p surayotgan o‘zbekistonlik Bobur Davlatov esa, klubi ruxsat bermagani uchun, JCH-2015ga bormaydigan bo‘ldi.
“20 may kuni Yangi Zelandiyaga yo‘l olamiz. U yerga “Toshkent – Dubay – Sidney – Vellington” yo‘nalishida uchamiz. Umumiy hisobda 22 soat parvoz qilishimiz kerak bo‘ladi. Yangi Zelandiya iqlimiga moslashish, uzoq parvozdan keyin tiklanish hamda bitta o‘rtoqlik uchrashuvi (Panamaga qarshi) o‘tkazish uchun u yerga ertaroq boryapmiz. Buning uchun O‘FFga minnatdorchiligimni bildiraman”, - dedi murabbiy.
Ravshan Haydarovning alohida qayd etishicha, O‘zbekiston yoshlar terma jamoasi oldiga yarim finalga chiqish vazifasi qo‘yilgan. “Biz eng kamida avvalgi mundiallarda qayd etilgan natijani takrorlashimiz zarur”, - deydi O‘zbekiston U-20 bosh murabbiyi Ravshan Haydarov.
