Saudiya aviatsiyasi hujumi natijasida Yamanning Xus shahrida 33 nafar tinch aholi halok bo‘ldi
Saudiya Arabistoni harbiy-havo kuchlari va uning “Arab koalitsiyasi” bo‘yicha ittifoqchilari payshanba kuni tongda Yaman shimolidagi Xus shahriga aviazarbalar berdi. Bu haqda “TASS” xabar bermoqda.
Al-Manar telekanali ma’lumotlariga ko‘ra, hujum oqibatida 33 nafar tinch aholi vakili halok bo‘lgan, yana 30 nafardan ortig‘i turli darajada tan jarohatlari olgan. Xus Yamanning Amran viloyatida joylashgan bo‘lib, ushbu viloyat qo‘shni Sa’da va Sana kabi koalitsiya tomonidan faol bombardimon qilinmoqda.
Chorshanba kuni Saudiya samolyotlari Sa’dadagi davlat muassasalariga hujum qilgandi. Shaharning ko‘hna qismi – Al-Hafjiy bozor maydoni va Xafsin tumanining bombardimon qilinishi natijasida 17 nafar tinch aholi halok bo‘lgan, 49 nafari yaralangandi.
SABA axborot agentligi xabariga ko‘ra, shaharda ikkita bank, pochta, kutubxona binolari vayron bo‘lgan. Koalitsiya aviatsiyasi Sa’da va unga qo‘shni Shoda va Majazdagi oltita AYQSHni yo‘q qilgan. Shahar atrofida esa Jebel-al-Ahmar tog‘ yon-bag‘irlaridagi isyonchi-xusiylarning qarorgohlariga reyd uyushtirilgan.
Sa’da shia-zaydchilarning diniy markazi hisoblanadi. Asosan mamlakat shimolida ommaviy bo‘lgan ushbu diniy yo‘nalishga Yamanning 48 foiz aholisi mansubdir. Sa’da poytaxt Sanadagi hokimiyatni egallab olgan isyonchi-xusiylarning “Ansorulloh” harakati tayanchi hamdir. Xusiylarning davlat to‘ntarishini Yamanning sobiq prezidenti Ali Abdulla Solih (u ham zaydchi)ga sadoqatini saqlab qolgan armiyaning aksariyat vakillari qo‘llab-quvvatladi.
Oliy inqilobiy qo‘mita chaqiruviga muvofiq, 16-aprel kuni Yaman shaharlarida urushga qarshi namoyishlar bo‘lib o‘tadi. Namoyish ishtirokchilari seshanba kuni BMT Xavfsizlik kengashi tomonidan qabul qilingan, shia isyonchilarga qurol va harbiy uskunalarni yetkazib berishni taqiqlovchi rezolyutsiyani qoralab chiqishadi. Hujjat isyonchi-xusiylarning “biryoqlama harakati”ni qoralab, ulardan zo‘ravonlikni to‘xtatish, Sana va boshqa hududlardan o‘z jangovar bo‘linmalarini olib chiqish, shuningdek, hukumat qo‘shinlaridan tortib olingan qurollarni topshirishni talab qiladi.
“Ansorulloh”ning siyosiy byurosi a’zosi Muhammad al-Baxitiy Al-Mayadin telekanaliga ma’lum qilishicha, BMT XK rezolyutsiyasi e’lon qilinganidan so‘ng, “Yamanga qarshi tajovuzkor harakatlar sezilarli kuchaygan”. Shunga qaramay, uning qayd etishicha, Yaman xalqining “inqilobni davom ettirish va Al-Qoida” terrorchilari va korrupsionerlarga qarshi kurash olib borish uchun qonuniy haqi bor”.
“Biz hali ham Saudiya Arabistoni tomonidan boshlangan urushga javob berganimizcha yo‘q, chunki masala siyosiy yo‘l bilan hal etilishiga umid qilib turibmiz”, - dedi al-Baxitiy. U xusiylar nomidan gapirarkan, “Yaman ichida muloqot o‘rnatishga tayyorligi”ni bildirdi.
