O‘zbekiston Respublikasi Markaziy saylov komissiyasi raisi M.Abdusalomov O‘zbekiston Respublikasi Prezidenti saylovida ovoz berishning borishiga bag‘ishlangan brifingda so‘zga chiqib, saylov bilan bog‘liq ma’lumotlarni oshkor etdi, deya xabar bermoqda Markaziy saylov komissiyasi matbuot xizmati.
Uning so‘zlariga ko‘ra, bugun soat 6.00 da O‘zbekiston Respublikasi Prezidenti saylovini o‘tkazuvchi 14 ta saylov okrugidagi saylov uchastkalarida ovoz berish jarayoni boshlandi. Shuningdek mamlakatimizning xorijiy davlatlardagi vakolatxonalari huzurida tashkil etilgan 44 ta saylov uchastkasining aksariyati ham ochilib, ovoz berish boshlandi. Ayni paytda Markaziy saylov komissiyasi bilan okrug va uchastka saylov komissiyalari o‘rtasida doimiy aloqa o‘rnatilgan.
“Birinchi bo‘lib ovoz berish O‘zbekiston Respublikasining Yaponiya, Koreya Respublikasi, Malayziya, Singapur, Xitoy, Indoneziya, Tailand va Hindistondagi vakolatxonalari huzurida tashkil etilgan saylov uchastkalarida boshlandi, — dedi M. Abdusalomov. — Markaziy saylov komissiyasiga ovoz berish jarayonining borishi to‘g‘risidagi ma’lumotlar on-layn rejimida kelib tushmoqda. Shuni alohida ta’kidlash joizki, O‘zbekiston Respublikasining fuqarolari saylovda yuksak siyosiy faollikni namoyon etmoqda”.
Komissiya raisining qayd etishicha, hozirga qadar saylovchilar ro‘yxatiga kiritilgan 20 million 798 ming 52 kishidan 14 million 900 mingdan ortiq saylovchi ovoz berishda ishtirok etdi. Bu saylovchilar umumiy sonining 71,6 foizini tashkil etadi. Shu paytga qadar saylovchilar ro‘yxatiga kiritilgan fuqarolarning 33 foizidan ortig‘i saylovda ishtirok etganini inobatga oladigan bo‘lsak, “O‘zbekiston Respublikasi Prezidenti saylovi to‘g‘risida”gi Qonunning 35-moddasiga asosan saylov o‘tgan, deb hisoblanadi.
Prezident saylovida Markaziy saylov komissiyasi tomonidan ro‘yxatga olingan 5 ta xalqaro tashkilot – Yevropada xavfsizlik va hamkorlik tashkilotining Demokratik institutlar va inson huquqlari bo‘yicha byurosi, Mustaqil Davlatlar Hamdo‘stligi, Shanxay hamkorlik tashkiloti, Butunjahon saylov organlari assotsiatsiyasi va Islom hamkorlik tashkilotidan hamda 43 ta davlatdan 300 nafarga yaqin kuzatuvchilar ishtirok etmoqda.
Bundan tashqari, Prezidentlikka nomzodlar ko‘rsatgan siyosiy partiyalardan 35 ming nafardan ziyod kuzatuvchilar, ommaviy axborot vositalarining vakillari ham ovoz berish jarayonini kuzatib bormoqda.
Hozirga qadar joylardan saylov jarayoni davomida saylov qonunchiligi buzilishi haqida ma’lumotlar kelib tushmadi.
Izoh (0)