Facebook’dagi guruhlardan biri a’zosi Toshkentdagi ko‘p qavatli uylardan biri yonida to‘xtab turgan avtomobillar suratlarini e’lon qildi. Unda podyezdga kirish yo‘lagiga ikkitalab mashinalar qo‘yilgani, odamlar o‘tishi uchun kichikkina yo‘l qoldirilganini ko‘rish mumkin.

“Mahalliy vaqtichog‘lik — ‘podyezdga kirib ol!’ deb nomlanadi”, — deya qayd etdi muallif.

Postga fikr bildirganlarning ko‘pchiligi kolyaskalar va keksalar o‘tishi uchun yetarli joy qoldirmagani uchun bu haydovchilarni tanqid qildi. “Podyezdga kirish yo‘lagidan mashinani vaqtinchalik qo‘yib, biror narsani tushirish yoki ortish uchun foydalanish mumkin, uni doimiy to‘xtatib qo‘yish uchun emas”, — deya qayd etdi ulardan biri.

Ba’zi foydalanuvchilar esa avtomobilchilarning bunday “qilmishi”ga sabab borligi, ko‘p qavatli uylar atrofida avtomobilni qo‘yish uchun maxsus maydonlar yo‘qligini ta’kidladi. Unga javoban guruhning o‘sha uy yaqinida yashovchi a’zosi aynan shu uydan 10 metrcha narida bunday maydon borligini aytdi.