Fransiya janubida A320 samolyotining halokatga uchrashiga aloqadorlikda gumon qilinayotgan ikkinchi uchuvchi Andreas Lyubitsning Dyusseldorfdagi kvartirasi tintuv qilinmoqda. Bu haqda “TASS” xabar berdi.
Avvalroq Airbus A320 samolyoti ikkinchi uchuvchisiga nisbatan “qasddan qotillik qilish to‘g‘risidagi” ish qo‘zg‘atildi. Marsel prokurori ikkinchi uchuvchi Andreas Lyubits ongli ravishda balandlikni pasaytirganini aytdi. “Uning buni nima sababdan qilgani hozircha bizga ma’lum emas, biz shuni bilamizki, samolyotni u qulatgan”, — deya ta’kidladi Roben.
Avvalroq Airbus A320 samolyotining ikkinchi uchuvchisi ataylab havo kemasi komandiriga kabina eshigini ochmagani ma’lum bo‘lgan edi. “Qora quti”dan olingan yozuvda uchuvchi qaytadan kabinaga kirmoqchi bo‘lgani, biroq buni uddalay olmaganini eshitish mumkin. Uchuvchi dastlab eshikni sekin taqillatgan, so‘ng qattiqroq urgan, shundan keyin esa eshikni urib sindirmoqchi bo‘lgan, biroq uddalay olmagan. Oxir-oqibat u kabinaga kira olmagan.
Eslatib o‘tamiz, 24-mart kuni Barselonadan Dyusseldorfga parvoz qilayotgan Airbus A320 samolyoti Fransiya janubida, Alp tog‘lari ustida halokatga uchrashi oqibatida layner bortida bo‘lgan 150 kishining barchasi halok bo‘lgan edi.
Izoh (0)