Artel Sentinel X smartfonining 16 Gb ichki xotirali va xotira kartasi uchun slotga ega bo‘lmagan yangi versiyasini chiqardi, deya xabar bermoqda “Mobinfo.uz”. Smartfonning birinchi versiyasida 8 Gb ichki xotira va microSD karta uchun slot bor edi. Xotirasi hajmidan tashqari, modellar bir-biridan farq qilmaydi.
Eslatib o‘tamiz, O‘zbekistonda ishlab chiqarilgan smartfon birinchi marta alyuminiy va magniy qotishmasidan qilingan korpusga va Gorilla Glass 3 himoya oynasiga ega bo‘ldi. Bundan tashqari, korpus iz qoldirmaydigan qatlamga ega.
Sentinel X 4 yadroli MT6582 chipida ishlaydi. Smartfonning 4,7 dyuymli IPS OGS displeyi 1280×720 (HD) o‘lchamiga ega. Qurilmaning tezkor xotirasi 1 Gb ni tashkil etadi.
Yangi telefon 8 megapikselli asosiy va 5 megapikselli old kameralar bilan jihozlangan. Batareyasi sig‘imi 1800 mA/s ga teng. U Android KitKat 4.4.2 operatsion tizimida ishlab, 3G, HSPA+, Wi-Fi orqali ma’lumot almashishga moslashtirilgan.
Poytaxtning “Fleshka” savdo majmuasida Sentinel X’ning 8 Gb ichki xotirali versiyasi 650 ming so‘m (Artel internet do‘konida 729 ming so‘m), 16 Gb lisi esa 810 ming so‘m (806 ming so‘m)dan sotilmoqda.
Izoh (0)